الخبير الدولى ” علاء خليفة ” يكتب لـ ” المحروسة نيوز ” : كيفيه إستخدام المبادئ النفسية فى التسويق ؟

اليوم سنتحدث سوياً  عن شى غاية فى الأهمية فى حملات التسويق الدولية وهو كيفيه استخدام المبادئ النفسية فى التسويق ، يعنى إزاى تصمم حملات تسويقية بتأثر على مشاعر وأحاسيس  العملاء أولاً؟

يجب أن  تعرف أن فى عالم التسويق النهاردة مهما كان المنتج كويس، سيظل المنتج  لوحده مش كفاية، والإعلان الحلو  للمنتج  مش مضمون انه يجيب نتيجة كل مره .

النجاح الحقيقى بييجى أولاً من فهم نفسية العميل وإزاى بيتفاعل مع المنتج ده  أو الخدمة اللى بتقدمها ، وده اللى بيخلى تجربة المستخدم مش مجرد عملية شراء، لكن رحلة كاملة من التأثير العاطفى والإنطباع اللى بيفضل معاه.

1. التسويق بالإحتكاك المدروس (Controlled Friction)

‏Controlled Friction هو أسلوب تسويقى بيعتمد على إضافة شوية خطوات محسوبة فى تجربة المستخدم علشان يخليه يقدّر المنتج أو الخدمة أكتر، بدل ما تكون كل حاجة سهلة جدًا لدرجة إن العميل ممكن ما يحسش بقيمتها.

إزاى الشركات بتستخدمه؟

• تصنيف العملاء الجادين من العاديين:

بعض الخدمات زى Amazon Prime بتطلب خطوة تأكيد إضافية لو عايز تلغى الاشتراك، وده بيدى فرصة للعميل إنه يعيد التفكير، وبالتالى بيقلل قرارات الإلغاء السريعة.

• تعزيز التفاعل مع المنتج:
• بعض التطبيقات التعليمية مثلا بتطلب منك تتفرج على فيديو صغير قبل ما تفتح ميزة جديدة، وده بيخليك تحس إنك اكتسبت حاجة مش بس إنك فتحت تطبيق وخلاص.
• مواقع كبيره زى Booking. com بتعرض لك رسالة “متبقى 3 غرف فقط!” وذلك علشان تخلق إحساس بالعجلة والندرة، وده بيخلى العميل ياخد قرار أسرع.
• زيادة الإحساس بالإنجاز:

لما تبقى خطوات التقدم  فيها شوية تحدي، العميل بيحس أكتر بقيمة الحاجة اللى حصل عليها، زى لما لعبة فيديو تخليك تكسب نقاط قبل ما تفتح مرحلة جديدة تشترك فيها.

2. التسويق بالتحكم فى التجربة (Controlled Marketing)

التحكم فى كل تفصيلة تخص المنتج أو الخدمة مش رفاهية ، لكنه أسلوب تسويقى مقصود، وشركة زى Apple بتطبق ده بامتياز.

طيب إزاى Apple بتستخدمه؟

• التغليف الفاخر (Premium Packaging)

لما تفتح علبة iPhone، هتحس إنها مصممة بعناية، حتى صوت فتح العلبة محسوب علشان يدى إحساس بالفخامة. الهدف مش بس إن التليفون شكله حلو، لكن كمان إنك تحس بقيمة الحاجة اللى اشتريتها.

• الترويج غير المباشر (Word of Mouth Marketing)

ناس كتير بتصور فيديوهات “Unboxing” أول ما يفتحوا علبة آيفون، وده بيخلق دعاية مجانية للمنتج بدون أى مجهود من Apple.

• إيحاء نفسى بجودة المنتج (Psychological Branding)

لما تشوف التغليف الراقى والتفاصيل المدروسة، عقلك بشكل تلقائى بيربط ده بجودة المنتج نفسه، فحتى لو ما جربتش التليفون لسه، خلاص اقتنعت إنه “أحسن” من أى منافس.

3. استراتيجيات نفسية اخرى لارم نستخدمها فى التسويق والإعلانات!

أ. اولا خلق تجربة حسية  (Sensory Marketing)

ومعناه ان كل ما زودت العوامل الحسية فى المنتج أو الخدمة اللى بتقدمها ، زادت قوة التأثير على العميل.

• مثلا Starbucks بيستخدم وترش ريحة القهوة فى الفروع علشان تخليك تحس بأجواء معينة.
• مثلا Nike بتصمم محلاتها بطريقة تخليك تحس بالحماس وكأنك رياضى محترف.

ب. التلاعب بالإحساس بالملكية (Psychological Ownership)

الإنسان بيحس دايمًا إنه بيملك الحاجة حتى قبل ما يشتريها، وده بيخليه أكتر عرضة  لقرار الشراء.

• مثلا لما تدخل محل سيارات وتاخد Test Drive، بتحس إن العربية بقيت ملكك، وبالتالى قرار الشراء بيبقى أسهل.
• مثلا البرامج والتطبيقات اللى بتديك نسخة تجريبية مجانية لفترة معينة بتلعب على نفس النقطة، لأنك بعد ما تستخدمها لفترة وتتعود عليها ، بتحس احيانا إنك مش قادر تستغنى عنها.

ج. خلق الإحساس بالندرة والاستعجال (Scarcity & Urgency)

• لو موقع تسويق منتج ما كتب لك “هذا العرض متاح لفترة محدودة!”، هتحس إنك لازم تشترى دلوقتى قبل ما الفرصة تفوت.
• عروض زى “اشترِ قبل الساعة 12 منتصف الليل وخد شحن مجاني” بتدفع العميل لاتخاذ قرار بسرعة.

4. إزاى تطبق المبادئ دى فى خطتك التسويقية؟

أ. اولا فى الإعلانات الرقمية:

• استخدم صور وفيديوهات بجودة عالية علشان توصل التجربة الحسية.
• قدم عروض لفترة محدودة تخلق إحساس بالندرة.
• خلى العميل يحس إنه جزء من المنتج قبل ما يشتريه.

ب. فى التجارة الإلكترونية:

• اهتم بتصميم علب المنتجات علشان تعزز تجربة “فتح الصندوق”.
• ضيف رسائل تحفيزية أثناء الشراء زى “لقد اخترت المنتج الأكثر مبيعًا!” علشان العميل يحس إنه بياخد قرار ذكي.

ج. ولو انت بتعمل خطه تسويق فى قطاع الخدمات:

• جرب تقدم استشارة مجانية أو نسخة تجريبية للعميل علشان يحس بملكية الخدمة قبل ما يشتريها.
• اعمل خطوات تسجيل بسيطة بس مش سريعة جدًا، علشان تخلى العميل يحس إن الخدمة لها قيمة.

الخلاصة: التسويق مش بيع، التسويق خلق تجربة فقط

ثق وتاكد ان العملاء ما بيشتروش المنتج لمجرد إنه كويس، لكن لأنهم حسّوا بحاجة معينة أثناء التجربة. وعلشان تحقق ده:

استخدم الاحتكاك المدروس (Controlled Friction) علشان العميل يحس بقيمة المنتج.

تحكم فى تجربة التسويق (Controlled Marketing) بداية من التغليف لحد خدمة ما بعد البيع.

استغل العوامل النفسية زى الإحساس بالملكية، الندرة، والتجربة الحسية علشان تزود المبيعات.

كل ما قدرت تتلاعب بالنفسية البشرية فى التسويق بشكل ذكي، كل ما خطه تسويقك  حققت نتائج قوية ومبيعات أعلي!

 

للتعرف وللمزيد من المقالات للكاتب  أدخل على الرابط التالى

الرئيسية

https://elmahrousanews.com/?s=%D8%B9%D9%84%D8%A7%D8%A1+%D8%AE%D9%84%D9%8A%D9%81%D8%A9+