الخبير الدولى ” علاء خليفة ” يكتب لـ ” المحروسة نيوز ” : تسويق التجربة السياحية:.. كيف تبيع حلم السفر لاي انسان ؟!

دلوقتي في عالم السياحة، التسويق الدولي ما بقاش مجرد إعلان عن فندق أو معلم سياحي، بقى تسويق عن تجربة كاملة. السائح لايبحث عن مكان ينام فيه وخلاص وزياره بيطلعها، السائح بقي بيدور على تجربة فريده يعيشها، تحربه حاجة يحكي عنها لما يرجع. وهنا ييجي دور تسويق التجربة السياحية في مقصد دولي.

طيب يعني إيه تسويق التجربة السياحية؟

ببساطة، ده ياسيدي نوع تسويق مبتكر في تسويق المقاصد السياحيه بيبيع الإحساس والمغامرة اللي السائح هيعيشها، مش مجرد المنتج. يعني بدل ما تقول “عندنا غرفة بفيو على البحر”، تقول “تخيل إنك بتصحى على صوت الأمواج، ومعاك كوب قهوة، قدامك منظر غروب الشمس”.

ليه تسويق التجربة مهم؟

1.بيربط الناس عاطفيًا بالمكان:

التجربة السياحية بتسيب ذكرى في القلب، وده اللي بيخلي السائح يحب يرجع تاني للمكان أو يكلم عنه للناس.

2.بتخلق ولاء للوجهة:

لما السائح يعيش تجربة مميزة، هيبقى عايز يكررها تاني. زي مثلًا رحلات النيل في الأقصر وأسوان، اللي بتسيب في النفس إحساس لا يتنسي.

3.جاذبية السوشيال ميديا:

الصور والفيديوهات اللي بيصورها السياح أثناء رحلتهم بتبقى تسويق مجاني للمكان. دراسة حديثة قالت إن 60% من الناس بيختاروا وجهتهم من الصور اللي بيشوفوها على إنستجرام!

إزاي تسوّق تجربة سياحية؟

1.ركز على التفاصيل:

متسوقش الفندق، سوّق اللحظة اللي هيعيشها الزائر. زي مثلًا بدل ما تقول “فندقنا فيه حمام سباحه”، قول “استمتع بسباحة هادئه وسط جبال البحر الأحمر مع شمس دافية طول السنة”.

2.التكنولوجيا هتنوررلك الطريق:

مثلا استخدم الواقع الافتراضي (VR) عشان تخلي الناس تعيش التجربة قبل ما تسافر. زي ما تعمل فيديو يوريهم شكل رحلة الفلوكة في النيل أو جولة في معابد الكرنك.

3.القصص بتشد الناس:

احكي قصص عن سياح عايشوا تجارب جميلة في المكان. القصص بتعمل تأثير نفسي كبير وبتحفز الناس يجربوا نفس الحاجة.

4.اشتغل مع المؤثرين:

شوف ناس عندهم تأثير على السوشيال ميديا، وخليهم يعيشوا التجربة ويشاركوا لحظاتهم. ده بيشد جمهورهم جدًا.

في الآخر، تسويق التجربة السياحية بيعتمد على إنك تفهم السائح عايز إيه. المغامرة؟ الاسترخاء؟

ولا اكتشاف ثقافة جديدة؟ المفتاح إنك تخليه يحس إنه جزء من القصة. السياحة مش مجرد سفر، دي رحلة لإحساس جديد ومغامرة تفضل في الذاكرة للأبد

وإلى لقاء ومقال أخر بإذن الله تعالى 

كاتب المقال 

علاء خليفة

رئيس مجلس إدارة شركة “خبراء الديجيتال لاستراجيات التسويق الحديث ” في الإمارات ومصر،

رئيس مجلس إدارة شركة EGY TRACE – ايجيتريس الدولية لتقنيات وحلول أنظمة التحقق والرؤية الحاسوبية وأنظمة وحلول الواقع المعزز.

محاضر دولي وخبير في وضع استراتيجيات التسويق الدوليه للمقاصد العالمية.

يمتلك خبرة واسعة في مجال التسويق والتكنولوجيا المتقدمة والبلوك تشين، وأنظمة الرؤية الحاسوبية، والذكاء الاصناعي، وكذلك أنظمة قياس وتتبع وتقارير الانبعاثات الكربونية وفقًا لاتفاقية ال CBAM