أخبار عاجلةسياحة وسفرشئون مصرية ومحليات

الخبير السياحى ” رضا زيدان “يكتب لـ ” المحروسة نيوز “عن : العمرة .. وكل حجرة ولها أجرة !!

في يوم 5 يناير، 2022 | بتوقيت 1:01 صباحًا

الطريق الي مكه المكرمه..كل حجرة ولها أجرة

عاوزين تسافروا عمره إن شاء الله السنادي
تعالوا أوضح لكم الطريق بإذن الله 

أولا تختاروا السفر للعمره في الأوقات دي

شهر رجب أو شهر شعبان أو شهر رمضان بإذن الله حسب مواعيدكم والاسعار ال تناسبكم لأن كل حجره ولها أجره هذا مثل سعودي وبإذن الله يكون خير لكم.
ومصر هتبدأ العمره من رجب كما صرحت السلطات بإذن الله

اول حاجه يكون معاكم جواز سفر صالح للسفر وفيه مدة لا تقل عن عام كامل من تاريخ السفر وصوره خلفيه بيضاء للمسافر

وتكونوا واخدين تطعيم كورونا
والتطعيم ده مسؤوليتكم انتم وتكونوا واخدين جرعات كامله من التطعيمات التي قررتها السعوديه ومضي علي اخر تطعيم 15  يوم قبل ما نطلب لكم التاشيره من السعوديه علي بوابة العمره
والتطعيمات المعترف بيها في السعوديه أربعه بدون حجر فندقي
فاييزر، بيونتك ،وموديرنا،وأكسفورد ،استرازينكا ، وجونسن

ولو واخدين أي تطعيم تاني غيرهم ينفع بس يبقي تعملوا حسابكم هيكون عليكم حجر في الفندق ثلاثة أيام متنزلوش من الغرفه في الفندق بعد ما توصلوا بالسلامه
وهتعملوا بعدها مسحه هناك قبل ما تاخذوا تصريح دخول الحرم من الوكيل السعودي عن طريق المشرف ال معاكم باذن الله أو ممكن تتلغي المسحه الله اعلم

ده غير المسحه ال هتعملوها هنا قبل ما تسافروا بـ 48  ساعه علشان تسافروا من مصر وتدخلوا بيها السعوديه

وغير ال المسحه ال هتعملوها لما ترجعوا بالسلامه مصر بس هيتاخد منكم المسحه في المطار وتروح بيتكم بالسلامه ولو فيه اي اعراض وزارة الصحه هتبلغك بالحجر في بيوتكم 15 يوم ده ال ذكروه وكيفية تطبيقه هذا ما سنراه بإذن الله
وده المعروف الان والله اعلم بكره ماذا سيكون أو يزيد شيئ أو يلغي شيئ.

وتطلعوا شهاده تطعيم دوليه للعمره محصن
من مكاتب وزارة الصحه عليها الكود ال بيقرأوه بالقارئ في المطار والحرم وخلافه تكون معاكم

ولما تكون جاهز للسفر انت ومن معك
تختاروا برنامج تسافروا عليه
سيكون محدد الفنادق والمواعيد مفيش تغير فيهم زي البرنامج ما هتختاروه هو ال هتسافروا عليه بإذن الله مواعيد وسكن مع المجموعه مفيش سفر مفرد أو عيله لوحدها زي زمان لازم مع المجموعه بإذن الله
يعني فيه مشكله لمن يحمل تايم شير موش هنعرف ندخله البرنامج بيه في الرحله الي الان والله اعلم بكره فيه ايه

العمرة فى الكورونا

أما زيارة سيدنا النبي ﷺ أو الروضه الشريفه أو أداء مناسك العمره في مكه كل ده هيكون بمواعيد محدده مسبقا يقوم بحجزها الوكيل السعودي ويجب الالتزام بيها كليا للرحله مجتمعه . ومع المشرف المرافق الرحله .

طبعا الالتزام بالتباعد في الحرمين ولبس الكمامه ده أساسي طوال الرحله

السن المقرر للسفر هيكون بإذن الله كما صرحت السعوديه يبدأمن 12 سنه للمرافقين لأسرتهم ويكونوا واخدين التطعيم برده ومعاهم الشهاده والصحه عندنا في مصر بدأوا تطعيم السن ده من فتره وموجود بحجز أيضا بالرقم القومي

أما النساء يكون معاهم محرم لمن هي أقل من  45  عام
ولو هي اكتر من  45  عام يبقوا بصحبه امنه بإذن الله ومسموح السفر لهم بدون محرم.

طريقة تعاملكم مع السفر اختلفت تماما قبل كورونا لازم تخلوا بالكم في الخروج والدخول والزحام كله له ترتيب وتباعد وكمامه وتحت سيطرة أجهزة الدوله هنا وهناك خوفا من انتشار اي وباء في الزحام

ولا تنخدعوا بالاعلانات الوهميه من البعض لانكم وببساطه تقدروا تشوفوا كل رحلتكم علي بوابة العمره الالكترونيه وتقدروا تعرفوا خط سير الرحله والشركات المرخص لها بتنظيم العمره علشان تقدروا تقدموا في شركه مرخصه لتنظيم العمره منعا للتلاعب وسيتم الإعلان بعد انتهاء التسجيل علي البوابه بكل التفاصيل .

وفيه شركات سياحه مرخصه أيضا ينفع تتضامن مع شركات زملاء ليهم ببرامج مشتركه للعمل وده برده هيكون تحت إشراف وزارة السياحه والاثار وغرفة شركات السياحه علشان الدوله والشركات خايفين علي المواطن وعلي حفظ حقوقه وتنفيذ المتفق عليه لأن هيكون فيه لجان دائمة من وزارة السياحه ووزارة الصحه وغرفة الشركات هناك علي طول علشان خايفين علي صحة المعتمر المصري حتي يعود سالما غانما بإذن الله .
والعقاب للمخالف من الشركات قاسي جدا جدا من الوزارة لأن لو حدثت مشكله كبيره ممكن يقفلوا علي العمره كامله من السفر ونعود الي نقطة الصفر . ف الالتزام واجب ضروري علي الجميع شركات ومعتمرين .

الان في مصر
الشركات تقوم بالتسجل علي البوابه الالكترونيه للعمره
والشركات السعوديه تقوم بتسجيل نفسها ايضا وذلك حتي تاريخ 25 يناير نهاية التسجيل زي ما الضوابط قالت وحددت التواريخ
وكل شركه مصريه مرخص لها العمره ولديها اكتمال للطلبات هتدفع ضمان مالي 2 مليون جنيه خطاب ضمان وشيك لغرفة شركات السياحه حتي يتم تفعيلها للعمل للعمره
ف خلي بالكم المرخص لهم بالعمره تقدر تشوفهم كويس قوي علي البوابه بعد الانتهاء وانتم في بيتكم ولازم يكون للشركات مشرفين ذو خبره مسجلين بالوزارة حتي يتم الموافقه للشركه بالعمل في العمره.

بوابة العمرة المصرية

والي الان لم يتم تحديد أعداد العمره من مصر دي سياسة دوله ونحترمهاجميعا . وستعلم الشركات العدد المصرح لها بعد تفعيلها علي بوابة العمره بإذن الله.

والي الان أيضا محدش عارف الرسوم الكامله عن كل معتمر من رسوم البوابه للمعتمر ورسوم التامين الصحي أو رسوم الخدمات الارضيه داخل السعوديه او حتي اسعار تذاكر الطيران النهائيه في كل فتره كاملة . هي اجتهادات وخبرات سابقه .

والواقعي هيظهر بعد انتهاء التسجيل يوم 25  يناير بإذن الله. ويمكن قبلها . اذا الغرفه أصدرت منشور بذلك
يعني اي برنامج الآن ليس نهائي وقابل للتعديل في السعر من الشركات بعد معرفة الرسوم النهائيه إن شاء الله

بمعني. ممكن حضراتكم تحجزوا الرحله المناسبه اليكم في الوقت والسعر مع الشركه التي ترغبون في التعامل معها وتكونوا جهزتم المستندات المطلوبه منكم قبل الموعد بوقت كافي من اجل السفر

وعمره مقبوله مقدما بإذن الله تعالى
اللهم تقبل يارب العالمين

كاتب المقال

رضا زيدان

رئيس مجلس إدارة شركة وعد للسياحة بطنطا

عضو الجمعيه العموميه لغرفة لشركات السياحة

   

مقالات ذات صلة