الدكتور أحمد صالح يكتب لـ ” المحروسة نيوز” : محاكمة المسئولين عن مهزلة تمثال ” رمسيس الثانى ” بمعبد الأقصر واجبة وفقاً لقانون الآثار!!

تقول المادة 42 من قانون الاثار رقم 117 لسنة 1983 والمعدل رقم 3 لسنة 2010 ان العقوبة للشخص العادي هي الحبس ما بين سنة لسبع سنوات وغرامة ما بين50 ألف جنيه الي 100 ألف جنيه  لمن قام ب “تغيير معالم اثر ” ..ده للشخص العادي ..انما للعامل في الاثار بتزيد الغرامة الي ما بين 100 ألف جنيه الي 250 ألف جنيه بالاضافة لمدة الحبس السابق ذكرها ..واللي حصل في واجهة وصرح معبد الاقصر بتنطبق عليه العقوبة ده

فقد قام العاملون بالاثار بتغيير معالم صرح وواجهة معبد الاقصر كالتالي  فقد اضافوا تمثال سابق ( او تالي ) لعصر الملك رمسيس الثاني الي صرح من عصر تالي( او سابق ) ووضعوا هذا التمثال اقصي يمين الصرح

فقد وضعوا تمثال ليس مكانه ان يكون في الواجهة ووضعوه في اقصي يسار الصرح

وبالتالي فقد قام العاملون بالاثار متعمدين تغيير معالم صرح اثري ويستحقون العقوبة السابق ذكرها طبقا للقانون

الوزارة  تصدر بيان  وتجادل بالغلط!!

المشكلة هي في المغالطات الموجودة في بيان الوزارة ..طبعا لما وزارة تطلع بيان وتجادل بالغلط وتقولك اصل كان فيه واجهتين …واجهة لمعبد رمسيس الثاني ومسجلة في النقش المجاور لمسجد ابو الحجاج …وواجهة معبد ما بعد رمسيس وده مسجلة في الفناء

وكمان تجادل وتقولك واجهة رمسيس مكانش فيه غير تمثالين جالسين ومسلتين …وده متسجل كما تقول الوزارة خلف الصرح بجوار مسجد ابو الحجاج !

عيب ياوزارة انت المفروض هيئة علمية ماتجادلش بالباطل …نقش ابو الحجاج اللي بتدعيه الوزارة ..اختارت جزء منه بس عشان تقنعنا بالغلط !! وسابت باقي المنظر وهو مسجل بجوار مسجد ابو الحجاج !!

زميلنا الدكتور منصور بوريك عمل دراسة علي الجزء اللي بتخفيه الوزارة ..والدراسة منشورة في دورية Memnonia رقم19  لسنة 2008

باقي المنظر برضه من عصر رمسيس الثاني ( اللي بتتغاضي عنه الوزارة ) بيمثل نقل المسلات والتماثيل الواقفة ( االي بتنكر الوزارة وجودها في عصر رمسيس الثاني ) الصور المرافقة بتوضح ده ..اسيب ليكم الحكم !

( اللي عايز التفاصيل يرجع للمقال المنشور في الدورية السابق ذكرها )

بيان الوزارة .. وإمشى مع الوزارة لحد باب الدار؟!!!

○دلوقتي الوزارة بتقول في بيانها ان النقش اللي خلف الصرح ( بجوار مسجد ابو الحجاج ) هو اللي من عصر رمسيس الثاني .. والنقش اللي في الركن الجنوبي الغربي من الفناء الاول بيرجع لعصر بعد رمسيس الثاني ( عصر الرعامسة )

○طيب طبقا للبيان بتاع الوزارة الواجهة بتاعة رمسيس كانت المسلتان والتمثالين الجالسين !! …والواجهة اللي بعد عصر رمسيس كان فيها التمثالين الحالسين والاربعة تماثيل الواقفة والمسلتان ( لاحقا هناقش الادعاء ده !! )

○خلينا نمشي ورا الوزارة في زعمها السابق .. السؤال بقا الوزارة اختارت اي واجهة ؟! ..لو بتاعة رمسيس يبقي كل اللي عملته في الثلاث سنوات غلط …ولو اختارت اخر واجهة يبقي التمثال الاوزيري وجوده غلط !!…يعني في كلتا الحالتين غلط !

○بس الوزارة حطت اربعة تماثيل …يعني هي اختارت اخر شكل للواجهة ( واجهة ما بعد عصر رمسيس ! ) وبالتالي وجود تمثال امنحتب الثالث غلط.. ووجود التمثال الاوزيري برضه غلط… وفوق كل ده مفيش معبد في مصر يوجد فيه تمثال اوزيري قدام الصرح !!

○تفضل نقطة في البيان ما اتكلمش عنها .. وهي .. ليه الوزارة حطت التمثال الاوزيري ؟! وايه هو الدليل او المثال المشابه لوضع تمثال اوزيري قدام واجهة معبد ؟!! …طبعا البيان عدي علي النقطة ده وركز بس علي تحديد تاريخ النقشين بتاع الصرح والفناء !

○ولم يتحدث البيان حول التجميع السيء والترميم المخالف للاعراف الدولية في التمثال الاوزيري ( المسخ !! )

○عشان كده البيان غير مقنع .. وفي الاخر تفضل نقطة ان البيان لم يحترم اراء علماء الاثار واساتذة الاثار في الجامعات المصرية اللي انتقدوا الموضوع واتهمهم باطلاق الشائعات !!!

مبررات واهية من مدير المعبد

○اولا : كونك انك تعتمد علي نقش وترفض نقشا اخر للواجهة فهذا امر مثير للغرابة ..فكونك انك ترفض نقش شكل الصرح في الفناء الاول وتقبل النقش المجاور لمسجد ابو الحجاج لن يمحو الخطأ القاتل الذي وقعت فيه وهو استحالة وجود تمثال اوزيري في الواجهة لان التماثيل الاوزيرية تكون علي جوانب الطريق الموكبي للاحتفالات او في الافنية

○ثانيا : طريقة بناء المعابد لا تتغير علي مر السنين فالمهندس المصري القديم يقوم بعمل رسم هندسي علي اسكتش ويعطيه للعمال ورئيسهم لتنفيذه ولو حدث تغيير فيجب ان تكون هناك اسباب لتغيير التصميم ..فالامر لا يكون مثلما فعلتم دون خطة او دراسة !

○ثالثا : زعم مدير معبد الاقصر بانهم نفذوا شكل الواجهة كما كانت في عهد الملك رمسيس الثاني ..فهل الملك رمسيس الثاني قالك تحط تمثال من عصر يسبق رمسيس الثاني وهو الذي وضعته علي اقصي يمين الصرح وقالك حط تمثال اوزيري علي اقصي يسار الصرح !!

○رابعا : ما كان يجب علي مدير معبد الاقصر ان يشرف علي ترميم وتركيب تمثال مسخ ويضعه امام واجهة معبد الاقصر !! فلا الابعاد ولا النسب ولا طريقة الترميم تشير الي علم الاثار في هذا التمثال المسخ !!

○واخيرا : كفاكم مبررات وهمية لاخطاء لا تغتفر والاولي لمدير معبد الاقصر ان يسارع باصلاح الخطأ ومحوه من اهم معابد العالم وهو معبد الاقصر !

على رضوان وروعة تمثال صرح معبد الاقصر

اتكلمنا كتير عن تمثال واجهة معبد الاقصر بصفته الاوزيرية ..لكن ما اتكلمتش عن تجميعه وترميمه ..ولازم بصراحة نستخدم اسلوب استاذنا الدكتور علي رضوان لما كان بيشرحلنا الفن والاعمال النحتية ..تعالوا كدة نتخيل ان احنا بنمدح هذه القطعة النحتية عشان حبايبنا في الوزارة بيزعلوا من النقد ..

○اول حاجة يا ولاد ( ده بصوت الدكتور علي رضوان ) ايه اول حاجة بتلفت نظركم في التمثال ..برافو ياولاد !.. الذراعبن ..شايفين عبقرية المصري القديم في انه خلي الذراع اليمين اطخن من الذراع الشمال ..لان رمسيس استخدم الذراع اليمين اكتر من الشمال في ضرب الاعداء وعشان كدة حصله ورم دائم

○كمان لازم تاخدوا بالكم من الكفين ..عندهم ضمور ..عشان رمسيس من كتر ما مسك السيف مرة بدون ما يقصد قطع شرايين كفه ولحد ما الدكتور جاله كان اتصفي دم الكفين فسببتله ضمور

○ وخلوا بالكم ..اينعم الكفين مضمومين ..بس بسبب الضمور الفنان قالك مستحيل يقدر يمسك المنشة اللي علي كتفه فسابها مرمية علي كتفه والفنان عارف انها مش هتقع لان ياولاد ماتنسوش ان رمسيس ملك واله والاله قادر يعمل اي شيء

○اما الابداع الحقيقي بقا ان التمثال فيه الوان متعددة ..يعني ممكن تشوفه تورلي وممكن تشوفه بيتزا وده يدل علي براعة المصري القديم في استخدام الالوان والتلاعب بيها ..يعني الراس والكتف تشوفوها بلون ..والجزع والساقين تشوفوها بلون وباقي الساقين والقدمين تشوفوها بلونين

○واخدين بالكم من النقبة اللي لابسها رمسبس ..ممكن ما تشوفهاش بس تحسوا بيها ..وقمة روعة المصري لما ينزلك الحزام فيحسسك انه قراب العورة !!

○وفاكرين ياولاد لما قلتلكم خعمواس اول مرمم ..وانتوا عارفين ان هو ابن صاحب التمثال ..هو للامانة مكانش عنده امكانيات عشان كدة جبس الساقين باسمنت اسود ..اوعوا تفتكروا انه متضايق من ابوه لا سمح الله ..ده بس مكانش عنده امكانيات

○وبكدة ياولاد عرفتوا عبقرية المصري لما يكثف ابداعاته في العمل النحتي ..يقدر بامكانيات بسيطة يصنع تورلي او بيتزا !!

كاتب المقال

احمد صالح

حاصل على ليسانس الآثار بجامعة القاهرة عام 1988 وكان من أوائل دفعته وحصل علي ماجستير العلوم بقسم المصريات بجامعة مانشستر – المملكة المتحدة عام 2002م في موضوع “التحنيط في مصادر الدولة القديمة“، وحصل علي المركز الأول في دورة عن تطبيق أنظمة المعلومات الجغرافية في الآثار في أوبسالا بالسويد عام 1995

وحصل علي شهادة خاصة من المجلس العالمي للمتاحف بسبب دوره في تأسيس متحف التحنيط بالأقصر ونال شهادة خاصة من اليونيفرستي كولج بلندن

تدرجة الوظيفى عمل مفتش آثار بمنطقة آثار الجيزة 1990 وكان أحد اعضاء الفريق المصري الذي كشف عن مقابر العمال الذين بنوا الاهراهات

باحث وناشر علمي بمكتب رئيس هيئة الآثار 1993

حصل على دورة تدريبية في “أنظمة المعلومات الجغرافية واستخدامها في الآثار” عام 1995 أوبسالا – السويد

عمل مديرا للمكتب الفني للأمين العام للمجلس الأعلى للآثار وسكرتير المؤتمر الأول للمجلس العربي للمتاحف

عمل أيضًا كأول مدير لمتحف التحنيط بالأقصر 1996 – 1999 ثم من 2000 – 2001م وهو الذي أسس المتحف الوحيد في العالم الذي يدور حول فكرة التحنيط وعملية التحنيط.

مدير آثار أبو سمبل 2001-2004،  مدير آثار ميت رهينة بالجيزة ،  مدير اثار معابد أبوسمبل والنوبه ،مدير صندوق انقاذ النوبة ،مدير عام اثار اسوان ،مدير النشر العلمى بآثار أسوان