هاتوحشتنى يا صاحبي
طول عمرى علاقتى بيك علاقة رجولة وجدعنة وماحدش بيفهمها غيرى انا وانت وبس من وانا صغير وانا بروح معاك فى كل حتة حتى الشغل اللى كان كله رسميات كنت بقعد اعيط وبروحه معاك
علمتنى ازاي ابقى راجل وابقى جدع وازاي اقف قدام الحياة والمصاعب وعمرك ما قليت معايا وكنت صاحبي ومعلمى قبل ماتكون ابويا
هاتوحشتنى مكالمتك ليا كل يوم الساعة 4 وتقوللى
فينك يا نجم عامل ايه طمنى عليك رايح الشغل دلوقتى طب خد بالك من الطريق وتوصل بالسلامة
محتاجك فى حاجات كتير اوى دلوقتى عشان تدينى توجيهاتك ونصايحك كالعادة
والله العظيم ناس لا اعرفهم ولا عمرى شوفتهم بيكلمونى يدعولك ويشهدوا ليك بمواقفك معاهم
بجد وحشتنى اوى يا صاحبي
دايماً كنت تقوللى حب الناس ودعواتهم هم اللى دايمين وده انا شوفته ف اكتر من معجزة خارجة عن الطب حصلت فى مرضك الأخير
قبل ما اسمى نفسى احمد الشناوى قولتلك هسمى نفسى احمد الشناوى وكنت خايف لحسن تزعل قولتى انشالة تسمى نفسك ” خزعبلاوى” انت هتنجح بنفسك ولا بإسمى ؟؟..انا مش قاعدلك يا صاحبي المهم انك تبقى حاجة تشرف
وكنت بتبقى اكتر واحد مبسوط لما الناس تشكر فيا قدامك وهم مايعرفوش انى ابنك لانى اسمى احمد الشناوى مش احمد سعد او احمد عباس .
كنت تقوللى بحس الناس مش بتجاملنى ف رأيها فيك انا كدة متطمن عليك
انا واثق انك هتقوم بالف سلامة وهترجع تانى وسطينا بعون الله
بس انت وحشتنى أوى وحاسس انك سامعنى دلوقتى زي ماحنا بنفهم بعض من نظرة عين!
الله يرحمك يا أبويا الغالى ..ويجعل مكانكم فى الجنة مع الصابرين والأبرار والنبيين والشهداء والصالحين .. اللهم آمين يارب العالمين.
