المنطقة الحرةشئون مصرية ومحليات

“الدكتور حسن صادق رضوان”يكتب لــ ” المحروسة نيوز ” عن : دروس الحياة 21 (17-4) “ تحقيق الحلم“

في يوم 7 يناير، 2021 | بتوقيت 12:00 مساءً

ولما كانت الحياة دروس كتبت بعض الدروس..وليس اي دروس..الدرس 21  (17-4) تحقيق الحلم

.. بعد ما اتجمع معايا مبلغ دخلت للحاج رحمة الله عليه اسأله اذا كان يعرف حد بيبيع عربيات ؟.

قالي علي واحد يعرفه من لعبة الهوكي (ماهو الحاج كان كابتن منتخب مصر في يوم في لعبة الهوكي) وكان الشاب عنده محل في المهندسين ، كلمته وطلبت عربية صغيرة مستعملة ولو فيه هوندا بالذات(لإننا كنا ساعات نركب مع واحد من اعضاء نادي الجزيرة وإحنا صغيرين أوتوستوب و كانت جبارة)

بعد كام يوم قالي ان فيه واحدة ست بتبيع عربية هوندا سيفيك حالتها ممتازة و لونها سكري  5 باب .

روحت شفت العربية عجبتني انطلاقتها الرائعة و ثباتها … بس السيدة كان معاها ابنها و طلبوا 8000  جنيه، طبعا ده مبلغ اكبر من اللي حوشته فأعتذرت، ووضحت ان أقدر ادفع 7000 جنيه ووقفنا عند 7300 و12قلتلهم حافكر،وانا كان معايا 5000 جنيه  حوشتهم من شغلي و تدريبات قديمة .

رجعت اوزن اموري وافكر في إن الهوندا عربية جميلة بس ان وعدت الحاج في حديث تحدي العربية اني حأجيب عربية مميزة ماعندوش زيها ، والعربية دي حلوة اوي بس مش عارف، قلت أصلي إستخارة، واللي فيه الخير ربنا حايقدمه ولو ليا نصيب فيها يبقي ربنا حا يتمم البيعة و ييسرها بإذن الله .

دخلت من بره وكنا في رمضان، والدنيا حر بزيادة، لقيت الحاج عنده ضيف وقاعدين في الصالون روحت داخل مسلم  و موطي علي ودنه قلتله عاوز 3000 جنيه  و حارجعهم.

تقريبا دي كانت أول مرة استلف مبلغ زي ده منه وواضح ان الضيف كان مع اخبار تسره فقالي حاضر لما ينزل الضيف ، ولم يسألني عاوزهم ليه ؟!

كنا في اواخر رمضان ونزلت رحت عند المعرض واتصلنا بالسيدة وجت وكتبنا العقد واستلمت العربية .. و نزلت الثمن لــ 7000 جنيه ، لأن ابنها عمل حركة مش محترمة وفك سماعات البايونير اللي ورا و قالي اصلها غالية فخفضت تمنها من السعر

روحت ادور العربية لقيت شكمانها مخروم قالوا نصلحه قلت شكرا انا حاعمله.، و لسه حا اتحرك بالعربية و الوساوس اشتغلت حاتروح تقول للحاج العربية مميزة بشكمانها المخروم ؟!!.

فقلت انا عملت اللي اقدر عليه واكيد هو حايقدر اللي عملته وانا ماقصرتش يا ربي والحمدلله علي كل شئ.

 وجاء الرد اسرع مما توقعت ” واذ تأذن ربكم لإن شكرتم لأزيدنكم”.، خرجت السيدة من المكتب جاية بتهرول وقالتلي الف مبروك عليك.

استني قبل ماتمشي حاوريلك التكييف بيشتغل ازاي؟!.. كتمت نفسي وسألتها هي فيها تكييف .. ضحكت وقالت لي تلاجة !!!

معقولة رد ربي بهذه السرعة،  احنا معندناش عربية مكيفة انها مميزة ومش عنده في عربيته.

خدت العربية ومشيت و بدوس بنزين طارت واترعبت و كنا في الثمانينات و من يومها وانا با ألبس حزام الامان ،والناس كانت تضحك عليا بس العربية رعبتني ، نقلة كبيرة من 128  للهوندا

روحت عملت الرخصة تاني يوم لان الورق كله كان جاهز وكان العيد كمان يومين

اخر يوم رمضان الحاج صحانا وقال حانسافر الصالحية جاي معانا قولتله اه بس حاطلع بعربيتي … انت جبت عربية ؟!

اه هوندا ..- الف مبروك و ماله خد امك معاك

خدت الوالدة معايا رحمة الله عليها وكانت الحرارة 48 وبعد ما اتحركنا قفلت الزجاج و شغلت التكييف فنامت

واحنا راجعين ركبت مع الحاج الله يرحمه ، واول ما وصلنا القاهرة قالتله انت تجيب عربية زي بتاعت حسن مكيفة انا اتسلقت !!!

لقيته بينادي عليا و بيقولي عملتها يا ابن الرفضي .. بس برافو عليك ربنا يكفيك شرها

خلصت حكاية اول عربية في حياتي وهي اللي بتديني طاقة لاي حاجة اقرر اعملها .. هدفك قصاد عينيك .. قلبك مع ربك ،رضي الوالدين واياك  ،اياك ان تنسي الحمد و الشكر لربك ، وماتوفيقي الا بالله.

كاتب المقال

الدكتور حسن صادق رضوان

المحاضر المتخصص في التحول الرقمي لقطاع السياحة

الخبير والمحاضر التسويقى الدولي

العضو المنتدب ورئيس مجلس ادارة شركة CIHOST

 

“الدكتور حسن صادق رضوان”يكتب لــ ” المحروسة نيوز ” عن : دروس الحياة 17 “تحدي السيارة” 

“الدكتور حسن صادق رضوان”يكتب لــ ” المحروسة نيوز ” عن : دروس الحياة 17 “تحدي السيارة” 

“الدكتور حسن صادق رضوان”يكتب لــ ” المحروسة نيوز ” عن : دروس الحياة 17 “تحدي السيارة” 

“الدكتور حسن صادق رضوان”يكتب لــ ” المحروسة نيوز ” عن : دروس الحياة 17 “تحدي السيارة” 

   

مقالات ذات صلة