ولما كانت الحياة دروس كتبت بعض الدروس ….. و ليس اي دروس ..درس لا ينسي (7)
عادة بأركب المترو لو نازل وسط البلد او رايح لوالدتي … و طبعا و انا راجع بأرجع بيه … كنت راجع بعد العشاء و المترو كان عدد ركاب العربية بالضبط علي عدد الاماكن الا انا الوحيد اللي كنت واقف
فيه من كل الفئات و لكن لفت نظري طفلة عندها حوالي 9- 10 سنوات و ماسكة في ايد باكو مناديل و في الايد التانية 5 جنيه … كانت واقفة قدام كنبة قاعد عليها 3 شباب و راجل كبير في السن و عمالة تقول لشاب فيهم خد مناديل و الشاب بيقولها معايا
الصراحة البنت كانت لحوحة جدا فالشاب اداها جنيه
خدت الجنيه و راحت علي اللي بعده
– خد مناديل
– شكرا مش عاوز
– لا حتاخد
– و الله معايا
– و ايه يعني حاتاخد برضه و خدت منه 5 جنيه
اتحركت علي اللي بعده هات خمسة جنيه و ماقالتلوش خد مناديل
البنت بصراحة كانت في منتهي الرزالة و فجأة لقيت صوت جاي من ورايا لسيدة لابسة عباية سودة بتقول للبنت ..
– يا بنتي كفاية بقي خلاص
البنت كملت مع الشاب .. اللي قالها
– طيب تاخدي جنيه و ترحميني بقي
– لا تجيب 5 جنيه زي اول واحد
– لا هو جنيه
– انت عارف انك حاتجيب 5 جنيه
الست – يا بنت بس بقي عيب كده
فجأة البنت التفتت للست و زعقت لها بصوت عالي جدا
– انتي تسكتي خالص ..
– عيب كفاية بقي
– بقولك اخرسي لما اتكلم انا انت تتكتمي خالص
الراجل الكبير في السن راح مزعق للبنت
– امشي يا بت بلاش قلة ادب و حيا .. انت مش مؤدبة كده ليه؟
فجأة الموقف تغير تماما البنت رمت ال11 جنيه في الارض و جريت علي الست اللي لابسة اسود و قعدت تصرخ انا مش عاوز الفلوس هو بيزعق لي ليه و الست اخدتها في حضنها و البنت هاتك يا عياط
الست عاتبت الراجل العجوز وقالتله بتزعق لها ليه ده انا بشتغل في مدرسة و احنا راجعين و هي بتساعدني
المترو سكت كله بتاع 5 دقائق
ماقدرتش بصراحة اسكت … لفيت للست اللي ورايا و سألتها
– هي دي بنت حضرتك
– ايوه
بصيت للبنت و قولتلها بتعيطي ليه
– عشان الراجل ده زعق لي
– و انت ايه اللي زعلك من الزعيق
– مش مفروض يزعق لي ده عيب
– ده ربنا اللي بعته عشان يعرفك انك ماينفعش تقولي لأمك اسكتي و اخرسي .. و كويس انه ما سلمكيش للعسكري
– انا ماكنش قاصدي
– يعني والدتك تقولك عيب اكتر من مرة و لا تسمعيش الكلام و لما الغريب يزعق تجري تعيطي
الناس كلها كانت بتسمع و البنت سكتت تماما
كملت حديثي …
– انا ما سمعتش اسفة يا ماما
– ما انا قلتلها
– زي ما عليتي صوتك في قلة الادب نحب نسمع صوتك عالي في الأدب
– انا اسفة يا ماما
رد راجل عجوز من بعيد ..
– لو كل الناس ولاد الاصول المتربيين ما سكتوش و علموا ولادنا حانبقي احسن شعب
نزلت من المترو و انا سعيد جدا … يا فرحة والدي الله يرحمه بتربيته اللي خلت حد يقول علينا اولاد الاصول المتربيين
الي كل واحد يشوف غلط اخلاقي رجاء
#_بدلا_من_ان_تلعن_الظلام .. اوقد شمعة
