دب طاخ
فوضى المرور فى مصر..وإنعدام الإحساس والمسئولية (2)
المركبات المخالفة الشفافة!!
سؤال مهم ..يا تري من المسئول عن فوضي المرور ؟.. هل هي الطبقة العادية؟.. ولا العاهات ؟..ولا طبقة الفوضوية؟.. ام الطبقة المتميزة؟.. أو المسئول عن تطبيق القانون وتنظيم المرور ؟!!..تعالوا نتعرف علي المجموعات السابقة
الطبقة العادية :-
هي المواطن اللي ماشي بعربيته عادي و بيسوق كما تربي و ليس كما تعلم … يعني مثلا ما بيعرفش يعدي من الشمال عشان العاهات ماشية في الشمال مش راضية تسيبه
العاهات :-
وهي فئة لا تصلح لقيادة السيارة علي الإطلاق وفاهمة روحها شمس تمر حولها السيارات وهي نقطة ارتكازها و تملي بيستنكروا كل شئ … يمشوا عكسي و يحتجوا لو حد طلب منهم يوسعوا او يطفوا النور العالي و العديد من المواهب.
الطبقة الفوضوية:-
وهي عادة ليس عليها أي نوع من السيطرة التوك توك والديليفري والموتوسيكلات وعربيات النقل اللي حتي الان فيه بالمقطورة واللي حاطين نور احمر في الفوانيس الامامية واللي بيمشوا علي عجلة موتوسيكل واحدة وهي مجموعة شفافة لا يراها رجال المرور علي الاطلاق!!.
الطبقة التي تميز نفسها:-
سيارات بزجاج اسود و ليس فيميه ولكن الاسود معاه كارتيه ايا كان.. واللي لاصقة نسر علي الزجاج الخلفي واللي بيتصل بالتليفون يكلم المسئول يوصي بتاع المرور فيرجع الرخص.. واللي شايل النمر اللي ورا وحاطط نمرة عاملها عند بتوع الدعاية و الاعلان !!
فقرة اليوم :-
التكاتك اللي في الفيلم أمام متحف الحضارة ودار الحديث مابين أمين الشرطة و بينهم وقالهم لفوا وإرجعوا عشان فيه حد مهم معدى.
https://m.facebook.com/story.php?story_fbid=4536570376355273&id=100000070676198
فواحد منهم شرحله إن معاه ناس ملهومش ذنب وإنه حا يطير بسرعة وانا كنت منتظر عشان الف وارجع فلقيته قاله طب عدي بسرعة فجريوا الإتنين اللي في الفيلم … ده أمام متحف الحضارة!!.
إنه انعدام الاحساس بالمسئولية توك توك امام المتحف”؟!! هي دي الفوضي بعينها !!.
كان زمان فيه إعلان بيقول المكن والناس اللي ورا المكن.
واحنا بنقول القانون .. الناس اللي ورا القانون
و للحديث بقية
كاتب المقال
الدكتور “حسن صادق رضوان ”
المحاضر المتخصص في التحول الرقمى لقطاع السياحة
الخبير والمحاضر التسويقى الدولى
رئيس مجلس الإدارة والعضو المنتدب لشركة القاهرة
لأنظمه الحاسبات المتكاملة للموارد CIHOST
“الدكتور حسن صادق رضوان” يكتب لــ ” المحروسة نيوز” دب طاخ عن :فوضى المرور في مصر..وإنعدام الإحساس والمسئولية (1) “اضرب المربوط ..”يبلطج” السايب!!”
