و لما كانت الحياة دروس كتبت بعض
الدروس… و ليس اي دروس (68)
كويس ان لسه عندكم ضمير!!
في يوم روحت كارفور اشتري حاجات ومن ضمنها كان باسكت كبير وبعد ما وصلت للعربية وابتديت افرغ الاكياس ،شيلت الباسكت لقيت علبة شاي تحته ماكنتش حاسبت عليها
رجعت تاني لكارفور ورحت لكاشير بتاع العشر فطع عشان اقوله علي الشاي
فلقيت راجل و مراته و بنته بيحاسبه علي حاجات كتير ومفسمينها عشرات عشان يعدوا من الكاشير ده
المهم حكيت للكاشير موضوع الشاي فقالي ثانية واحدة اخلصهم و افهم من حضرتك
خلصوا وخرجوا و انا كنت واقف للكاشير من بره وحكيت للكاشير ان الشاي كان في العربية و انا ماحاسبتش عليه ،كل ده و الراجل و مراته قاعدين يتفرجوا عليا
الكاشير قالي عشرة جنيه … بطلع الفلوس لقيت الراجل اللي كان مع مراته طلع ورقة من جيبه
وقال للكاشير لو سمحت هي الورقة دي مكتوب فيها كام علبة لبن صغيرة
رد عليه قاله 3 علب
فالراجل قاله بس احنا كنا واخدين 4 علب
ممكن نحاسب احنا كمان علي العلبة الرابعة
قاله ممكن
بصيت له و ضحكت … فضحك
قلته طب كويس ان لسه فيه ضمير وانا صحيته
فقالي الشبطان شاطر
قلت له خلي الموقف ده تملي في ذاكرتك و أفتكر الكلمة دي
مال الناس كناس
ربنا يغفر لنا جميعا
كاتب المقال
الدكتور “حسن صادق رضوان ”
المحاضر المتخصص في التحول الرقمى لقطاع السياحة
الخبير والمحاضر التسويقى الدولى
رئيس مجلس الإدارة والعضو المنتدب لشركة القاهرة
لأنظمه الحاسبات المتكاملة للموارد CIHOST
