ولما كانت الحياة دروس كتبت بعض الدروس ..
وليس اي دروس الدرس ( 32 ) “ الفتاه التى غلبت الشيطان “
القصة دي انا بأحكيها عشان غيرت في سلوك بنتي واللي عاوز يجربها …يجربها…كنت بأكلمها في التليفون ،وبأسالها عاملين ايه اكل النهارده .. “بنتي عندها 12 سنة”
جالي مكالمة من مراتي بتشتكي ان بنتي مش عاوزة تاكل وانها زعلانة ومش عاجبها الاكل فقلتلها طيب اديهالي عشان اكلمها.
.لقيتها ردت وهي زعلانه وبتزعق : ماما عاملة فراخ و انا مش عاجبني الفراخ!!.
قلتلها : بلاش تاكلي فراخ يا حبيبتي و كلي عيش !!.
قالت :يعني انا مأكلش فراخ اقوم اكل عيش …حاجة غريبة؟!.
سكت شوية وبعدين قلت : انت بتضحك علي ايه ومطلع لسانك؟
هي المكالمة لسه خلصت . لما ابقي اقفل وهي ما اكلتش ابقي اضحك زي ما انت عاوز، أعوذ بالله منك!!
قالتلي : انا ما بضحكش …انت بتكلم مين.
قلتلها : فيه ناس مش لاقيه العيش واللي بيخليكي مش عاجبك الفراخ ،ان الشيطان يقعد يكرهك في نعمة ربنا لغاية ما تزول ، وبما انك عارفة ان النفس امارة بالسوء فلازم تأدبيها وتقرفي الشيطان في عيشته.
قالتلي: ازاي
قلتلها : مادام مش عاجبها الفراخ يبقي تأكل عيش حاف ، ولو مش عاجبها صومي وخلي بالك لو صمتي حا تفطري برضه فراخ او عيش ،فاكرة احنا في رمضان بنصوم ازاي من غير اكل و كمان ما فيش ميه.
افتكري إن ربنا كتب علينا الصيام عشان نأدب النفس ونحس بالفقرا اللي مش لاقين اكل وكل الاديان بتقول كده احنا بنصوم عشان نحس بالفقرا، فاكرة طنط نانسي لما كانت بتيجي عندنا وكنا كلنا بناكل كشري معاها عشان صايمة ،ومابتكلش حاجة فيها روح ، هي كمان عندها صيام،و فاكرة ازاي ما بتكلش قدامنا و احنا صايمين.
قالت : فاكرة
قلتلها طب هاتاكلي ايه النهارده
قالتلي : هأكل فراخ ،والحمد لله ،ولو مش عاجب نفسي يبقي حأكل عيش ، وبلغ اللي كان قاعد بيضحك في الاول انك كسبت وان انا حانكد عليه.
وأكلت الفراخ
هو ده شعب مصر وهي دي اخلاق المسلمين والمسيحين ولو حكمت عشان مصر كلها تعيش في سعادة كلنا نأكل عيش و لا يبقاش فيه حد احسن من حد مش كده ولا ايه
كاتب المقال
الدكتور حسن صادق رضوان
المحاضر المتخصص في التحول الرقمي لقطاع السياحة
الخبير والمحاضر التسويقى الدولي
العضو المنتدب ورئيس مجلس ادارة شركة CIHOST
