“الدكتور حسن صادق رضوان”يكتب لــ ” المحروسة نيوز ” عن : دروس الحياة 15 ( قرصة أذن غيرت حياتى )

ولما كانت الحياة دروس كتبت بعض الدروس ..و ليس اي دروس 12 (1-15)( قرصة أذن غيرت حياتى )

كنت في سنة سادسة ابتدائي و كنا وقت امتحانات اخر السنة… و كانت سادسة ابتدائي في هذا الوقت امتحانات نقل من المستوي الابتدائي الي التعليم الاعدادي و طبعا يا تنجح يا تسقط ..

و في اليوم اللي قبل امتحان الجغرافيا كان فيه ماتش للاسماعيلي و الاهلي و في السبعينات مصر كلها كانت ورا الاسماعيلي و كان فيه لاعبين كبار و طبعا دماغي قفشت و عاوز اتفرج علي الماتش .. الحاج رحمة الله عليه قالي قوم ذاكر وراك امتحان و طبعا غضبت و رحت داخل الاوضة و قافل الباب عليا بالمفتاح و مش مذاكر .. و طبعا فتحت بعد الماتش ما قرب يخلص و كان الاسماعيلي كسبان و بعد ساعة و اكتر من التحايل و التوسل من امي الله يرحمها … كل شوية تخبط يا حبيبي افتح طيب خد الكتاب … و انا ارد : لا

المهم في الاخر فتحت

ابتدينا نذاكر تقريبا علي 8:00وطبعا ماما ماسكة الكتاب و عمالة تراجع و انا اقول كلمتين واطلع ابص علي الماتش من ورا الحيطة و ارجع

خلصنا علي 12:00 بالليل و الصبح و انا نازل علي السلم ما زلت اذكر امي و هي واقفة علي السلم بتقولي : هي تونس بتصدر ايه

ارد : زيت الزيتون

ماما: و ايه تاني

انا : والفوسفات

ماما : و ايه تاني و تروح متعصبة و انا حاجي معاك الامتحان افكرك و الله حرام عليك

و مرت الايام و في يوم كان عندنا ضيوف و خد اتكلم في التليفون و قال النتيجة اتعلقت في المدرسة

ماما قالت لي قوم البس نروح نشوف النتيجة و نزلنا روحتا المدرسة اللي كانت علي بعد 7 دقائق مشي

النتيجة كانت متعلقة علي الحيطة بتاعة المكتبة من ناحية الحوش ..

بصينا لقينا مكتوب قدام اسمي 270 و طبعا مافهمناش و لكن الدرجة من 300

و احنا ما نعرفش …كان الأستاذ احمد واقف جنب لوحة النتيجة فماما سألته ده معناه ايه ؟ فرد معناه انه 90 ٪؜

ماما غضبت جدا و راحت مسكاني من ودني و شدتها و دي كانت عقاب عذا الزمان

الأستاذ احمد تدخل و قالها نمرته حلوة حنب باقي الفصل خضرتك زعلانة ليه ؟

ماما ردت : لأنه ما ذاكرش و لأنه كان ممكن يجيب ال 300 لأنه ذكي و لكن لعبي جدا و شقي .. كل ده و هي ماسكة ودني و ما سابتهاش الا بعد ما خرجنا من المدرسة

مشينا الي البيت و انا ماشي قدام ماما سابقها بكام خطوة و زعلان حدا من شدة ودني و خايف لحسن تطولها تاني

وصلنا البيت و طلعنا لقيت الباب مفتوح و الضيوف كلهم في انتظارنا و طبعا انا طالع بعيط و زعلان عشان اللي حصل و رحت داخل من وسط الناس علي الاوضة و قافل الباب تاني ..

الضيوف افتكروني سقطت و لما ماما طلعت سألوها خير ؟

ردت ماما : الاستاذ جاب 90 ٪؜ عشان عاوز يتفرج علي الماتش

الناس استغربت … ايه يا ست مالها 90 ٪؜ …؟ نمرة كويسة جدا

و ماما ترد بصوت … ده ما ذاكرش عشان ماتش .. لو كان ذاكر كان كسر الدنيا .. انا عارفة ابني ذكي و شاطر بس لما يحب و انا بعيط كل مرة اسمع فيها ماما تقول “انا عارفة انه ذكي” كنت باضحك من جوه و ابقي سعيد … دي شهادة علي صدري اللي بتقوله امي.

شدة الودن دي في كل ازمة حتي الان تظهر و تفكرني … انت ذكي بس ذاكر … انت تقدر لو عاوز .. اجل الراحة انت تقدر

الله يرحمك يا امي حبيبتي وقتها كنت مش فاهم ليه كنتي بتوطي صوتك مع الضيوف يوم النتيجة و انتي بتقولي “كان غضبان و عاوز يتفرج علي الماتش ” و تعليه لما تقولي ” كان يقدر لو عاوز هو ذكي حدا”

فهمت لما كبرت انك كنت بتوصليلي رسالة و كنتي عارفة اني بسمع

اللهم اغفر لها و ارحمها و اجعل قبرها. روضة من رياض الجنة

و للحديث بقية

كاتب المقال