الكاتب الصحفى ” جمعة قابيل ” يكتب لـ ” المحروسة نيوز ” : ترند الفضايح ..ونقابة الصحفيين!!

اتصلت بي وقالت انا زميلتك وعاوزة استضيفك فى برنامجى نتكلم عن الفضايح اللى بتحصل فى البلد
قلت: زميلتى فين
قالت: بصراحة حاولت اكون صحفية وادخل نقابة الصحفيين طلبوا شهادات وارشيف صحفى وحاجات كتير قلت خلاص هبقى اشتريها وخلاص
قلت: تشترى ايه
قالت: كارنيه النقابة
قلت: هو بيتباع؟!!
قالت: اى حاجة الوقتى بتتباع يا استاذ
قلت: حضرتك اصلا دارسه ايه
قالت: مش مهم الدراسة العلم فى الراس
قلت: طيب بتشتغلى ايه
قالت: حاولت زمان اكون ممثلة وفشلت وحاليا تقدر تعتبرنى سيدة أعمال وبقدم برامج
قلت: ماعلينا .. ربنا يوفقك
قالت: ها .. هتكون ضيفى فى البرنامج نتكلم عن الفضايح فى البلد ولا لا
قلت: برنامج ايه والأهم تقصدي ايه بالفضايح اللى فى البلد
قالت: فضايح مهرجان الجونة واللى قالعين وعاملين فيها فنانات وهم لا مؤاخذة بيبوظوا سمعة بلدنا
قلت: وايه علاقة بلدنا بده .. بلدنا اكبر من الف مهرجان ومليون فنانة
قالت: خلاص نتكلم عن فضايح التيك توك والبنات اللى بهدلوا سمعتنا وسمعة بلدنا
قلت: معلش ممكن تطلعي بلدنا بره حوار الفضايح ده
قالت: خلاص نتكلم عن البرامج اللى شغلتها استضافة البنات الشمال وآخرهم اللى اسمها……
قلت: معلش حضرتك ليه كل موضوعاتك من النوعية دى
قالت: علشان الفضايح دى هى اللى بتعمل مشاهدات وبتحقق الترند
قلت: ماحضرتك كده بتعملى زيهم وبنفس الأسلوب اللى مش عاجبك
قالت: لا انا بتكلم على الفضايح دى علشان الناس تاخد بالها وتقاطعهم
قلت: ماتبداى بنفسك وقاطعيهم انتى
قالت: تقصد ايه
قلت: لو فعلا بتحبي بلدنا وهدفك الخير للناس تعملى حاجة واحدة
قالت: اعمل ايه
قلت: تتجاهلى الفضايح دى تماما وناقشي موضوعات تانية اهم وافيد للناس
قالت: زى ايه
قلت: زى مثلا تعملى حملة لتخفيض الاسعار او ساعدى فى توظيف الشباب او تزويج البنات او اتعاونى مع كم مستشفى فى علاج البسطاء او حتى اعملى فقرات ترفيهية تخفف عن الناس يعنى عندك الف حاجة وحاجة
قالت: كده عمرى ماهعمل ترند ولا حد هيعرفنى ولا هيشوف برنامجى .. الفضايح هى اللى بتعمل ترند
قلت: وكده صعب اكون ضيفك لان الفضايح مش اهتماماتى ولا بحب اتابعها
قالت: انا اخدت رقمك من زميل وقال انك صحفى كبير بس واضح انه ميعرفكش كويس
قلت: فعلا انا صحفى صغير مش بيفهم فى الفضايح وهو ميعرفنيش كويس
قالت: طيب ترشحلى مين يكون صحفى متخصص فى الفضايح
قلت: على أيامنا مكانش فيه التخصص ده لكن اوعدك لو عرفت حد متخصص فى ده هقولك!!
ووو
انتهى الحوار ولكن السؤال:
انتحال صفة طبيب او محامى او مهندس او اى مهنة جريمة ويعاقب عليها القانون
الا مهنة الصحفى او الإعلامى مباحة ومستباحة!

فمتى تتوقف هذه المهزلة يا مجلس نقابة الصحفيين؟!!

كاتب المقال 

جمعة قابيل 

مدير تحرير مجلة الإذاعة والتليفزيون 

عضو الجمعية العمومية لنقابة الصحفيين 

إعلامى ومقدم برامج جماهيرية بالعديد من القنوات الفضائية الرسمية

رئيس تحرير بوابة الجمهورية الجديدة