عندنا أفضل لاعب كرة قدم في العالم ،وأفضل لاعبة اسكواش في العالم ،وافضل لاعبة كاراتيه في العالم، وافضل بطل كمال اجسام في العالم ،ورابع احسن لاعب كرة يد في العالم ،وعندنا أهم قناة بحرية في العالم، واكبر محطة تحلية مياه في العالم، وعندنا أحسن قطن في العالم ،وأكبر متحف للآثار في العالم، وعندنا أكبر هرم في العالم.
وأيوه عندنا جندي مفيش زيه في العالم ، زي اليومين دول فى عام 1973 وتحديداً فى 6 أكتوبر ، عبر قناة مزروعة نابالم في عز الضهر علي مركب مطاط وهو صايم مجدفاً لحائط عملاق عالشط التانى لا يعرف ماذا وراءه ولا يملك إلا سلاحاً قديماً علي كتفه ولكنه وصل وطلع وعدي وإنتصر ..وقال الله أكبر بأسمه وإسمى وإسمك.
المصريين يوم 6 أكتوبر الفجر ، إتسحروا وكانت أرضهم مسلوبة كانوا بيفطروا المغرب وأرضهم رجعت و علمهم إترفع ..علشان أجيال النهارده تعرف وتقرب الحدث.
ست ساعات بس عقبال ما خدمة الفيسبوك وانستجرام انقطعت ورجعت اشتغلت تانى، كان رجال مصر نقلوا تاريخ مصر من صفحة إلي صفحة تانية خالص وغيروا الجغرافيا من خريطة الي خريطة تانية خالص.
وإنت لسه بتقلب في التليفون وبتحط صورة أو بتكتب بوست وعايز تعرف مش شغال ليه… كان رجال مصر الأبطال .. دكوا أكبر ساتر ترابي في العالم ،وعبروا القنال وعملوا كبارى عليها ورفعوا العلم وإتغير التاريخ وإتغيرت الجغرافيا ،ورجع الحق لأسياده عقبال ما انت رجعت تعرف تعمل لايك أو تكتب كومنت ورجع تليفونك يشتغل تانى …بس كده ..وخلاص !!
يوم 6 أكتوبر ليس فقط ملحمة طيران وبحرية ومدفعية، ولكنه ملحمة شعب كامل وملحمة عقل ودهاء ومكر وخداع وتلاحم وحب وتفانى وإقدام وإستنزاف وإدارة ورؤيا وثقة ، وقفا تاريخى (و لسه معلم) علي عدو قالوا عنه أنه لا يقهر !!
إحنا أحلي وأقدم وأرق وأيوه أشجع و أذكى ناس في العالم….
كل 6 اكتوبر و مصر كلها طيبة …يا عالم!
كاتب المقال
معتز صدقى
عضو الجمعية العمومية لغرفة شركات ووكالات السفر والسياحة
مدير عام شركة ترافكو هوليدايز
مدير قطاع الطيران و السياحة الخارجية والطيران بشركة تراڤكو
نائب رئيس لجنة السياحة بالغرفة الأمريكية
