في اخبار كتيرة بتتكرر كل فتره من ساعة ما بدأت التطعيمات تخرج للنور إن لقاحات معينة زي جونسون أند جونسون، وأسترازنيكا أوكسفورد ،بيسبب نقص في الصفائح الدموية بنسبة ضئيلة طبقا لوكاله الصحة الأوروبية.
فانا حبيت بقي أوضحلكم الحكاية من الأول بأسلوب ولاد البلد ايه اللي بيحصل من لقاح جونسون أند جونسون، وأسترازنيكا أوكسفورد اللي هما الاتنين بيسببوا نقص في الصفائح الدموية و جلطات .
اولاً
لما الناس إبتدت تاخد اللقاحين دول بدأت تظهر حالات جلطات في الأوعية الدموية في المخ وفي البطن وفي حالات ماتت بسبب الموضوع ده لكن حسب الإحصاءات في أوروبا نسب الناس اللي ممكن تتصاب بالجلطات بعد جونسون أند جونسون وأسترازنيكا أوكسفورد تقريبا 4 من كل مليون ودي نسبه قليلة مقارنة بخطر كورونا نفسه.
طيب ليه بتحصل الجلطات “thrombosis” وكمان بيحصل نقص للصفائح الدموية “Thrombocytopenia” ؟!
لقاح جونسون اند جونسون ولقاح استرازينيكا لما بيدخلوا الجسم الغرض بيكون انهم يحفزوا الجسم مناعيا علشان يطلع اجسام مضادة ABs ضد الفيروس الABs “الاجسام المضاده” دي بتعمل Platlets Activation يعني بتنشط الصفائح الدموية في الجسم فيحصل تجمعات للصفائح الدموية اللي بتكون Blood clots جلطات بتكون صغيره فبتتحرك في الاوعيه الدمويه الكبيرة ولكن في الاوعيه الدموية الصغيرة الضيقه زي اللي فالمخ بتقف وتتجمع فيحصل جلطات thrombosis
طيب الـ platlets الصفائح الدموية بتنقص ليه ؟
لما الأجسام المضاده ABS تنشط الصفائح الدموية زي ما قلنا بتتجمع مع بعض وتعمل clots تجلطات بتتحرك في الأوعية الدموية الكبيرة وهنا هتوصل للـ Spleen الطحال فالطحال هيقعد يكسر فيها ويخرجها برة الجسم وبالتالي هيحصل نقص في الصفائح الدموية.
طيب لو انا اخدت لقاح جونسون أند جونسون، وأسترازنيكا أوكسفورد هل في اعراض هتظهر وتحذرني ان ممكن يحصل جلطات وبتظهر خلال قد ايه من تلقي اللقاح ؟
ايوه في اعراض بتقولك انك داخل على جلطة بعد تلقي اللقاح ..الاعراض بتظهر في الفتره من اليوم الرابع للقاح وحتي مده اسبوعين ..الاعراض دي زي
- صداع شديد مابيروحش بالمسكنات
- انتفاخ وتورم في الرجل
- زغلله في العين
- ضيق في التنفس والم في الصدر
- بقع حمرا في الجلد
- الم مستمر في البطن
- مشكلة في الكلام والنطق
عند ظهور أي عرض لازم تروح المستشفي وتبلغهم إنك خدت واحد من اللقاحين دول
من المده كذا وهتتلحق ان شاء الله تعالى.
دمتم بخير ..
كاتب المقال
دكتور محمد صلاح الحرمى
بكالوريوس كلية الصيدلة جامعة MTI
صاحب ومدير صيدليات ريڤان بالمقطم
مفتش صيدلي بيولوجي بهيئة الدواء المصرية (EDA)
[email protected]
[email protected]
[email protected]
