ولما كانت الحياة دروس كتبت بعض الدروس ..
وليس اي دروس .. الدرس (59) “صداقة الحيوانات“
علي مر الزمن ربيت حيوانات كتير من قطط لكلاب لأسماك وعصافير وسلاحف …منهم اللي حي يرزق و منهم اللي مات.
كانت بدايتي مع القطط واللي تعتبر من المرتبة الراقية فهي نظيفة وبتحترم نفسها وتصر ان تدفن فضلاتها ومخرجاتها عكس حيوانات اخري كثيرة.
والقطط علمتني يعني ايه صداقة مع حيوان لما لها من شخصية اعتبرها لها عزة نفس وقد يفسرها البعض علي انها غدارة .. ولكن من وجهة نظري هي صديق و ليست عبد!!.
بعض الناس فاهمة تربية الحيوانات غلط….مين اللي فهمك انك ممكن تربي حيوان فلما تقدمله الاكل يبقي هو عبد عندك و تبهدله؟!!.
الحيوان ده روح و صديق ولو مش قد الصداقة اللي من النوع ده ايعد عنها
ليه ؟!!.. اقولك
قال تعالي: وَمَا مِن دَابَّةٍ فِي الْأَرْضِ إِلَّا عَلَى اللَّهِ رِزْقُهَا وَيَعْلَمُ مُسْتَقَرَّهَا وَمُسْتَوْدَعَهَا ۚ كُلٌّ فِي كِتَابٍ مُّبِينٍ (6) هود
قال تعالي: (وَمَا مِن دَآبَّةٍ فِي الأَرْضِ وَلاَ طَائِرٍ يَطِيرُ بِجَنَاحَيْهِ إِلاَّ أُمَمٌ أَمْثَالُكُم مَّا فَرَّطْنَا فِي الكِتَابِ مِن شَيْءٍ ثُمَّ إِلَى رَبِّهِمْ يُحْشَرُونَ ) الأنعام
وهناك مقولة للفيلسوف الألمانى” إيمانويل كانت ” تقول (الذي يتسم بالقسوة على الحيوانات يصبح صعبا أيضا في تعامله مع البشر , نستطيع أن نحكم على قلب الانسان من معاملته للحيوانات).
لو انت شايف انك ها تاخد ثواب عشان اكله … اقولك انسي لو ما كنت مقعده معاك كان ربنا ها يرزقه
وعن أبي هريرة رضي الله عنه أن رسول الله صلي الله عليه وسلم قال: (بينما رجل يمشي بطريق اشتد عليه العطش فوجد بئراً فنزل فيها فشرب ثم خرج فإذا كلب يلهث يأكل الثري من العطش فقال الرجل: لقد بلغ هذا الكلب من العطش مثل الذي كان بلغ مني فنزل البئر فملأ خفه ماءاً ثم أمسكه بفيه حتى رقي فسقي الكلب فشكر الله له فغفر له) قالوا: يا رسول الله وإن لنا في هذه البهائم لأجراً؟ فقال:(في كل كبد رطبة أجر).
انما لو حطيته عندك وما اكلتوش دخلت فيه النار
فاللي فاهم انه اشتري القط ولا الكلب عشان يستعبده …لا ..يرحمه احسن.
الحيوان ده صديق فاهم يعني ايه ؟!!.
يعني يلعب معاك وقت ما انتوا الاتنين تتفقوا
لما ينام سيبه ينام براحته
لازم يتنضف لأنه في حياته البرية بينزل الميه ويغطي روحه طين … الخ
و لازم ياكل و يتعالج
اللي ربي قط او كلب وطرده بره بيته وقت ما مرض او عجز وسابه من غير علاج ولا اكل بعد ما اتعود علي البيت حسابه عند ربه.. اديه لحد يعتني بيه.
و لو مش ناوي تكمل معاه الصداقة زي مع البشر ريح نفسك وابعد روحك عن هذا النوع من الصداقة اللي ممكن يدخلك جهنم!!.
عن النبي صلي الله عليه و سلم “دخَلَتِ امرَأَةٌ النَّارَ في هِرَّةٍ، ربَطَتْها، فلَمْ تُطْعِمْها، ولَـمْ تَسْقِها، ولَـمْ تُرْسِلْها فتَأْكُلَ مِن خَشَاشِ الأَرْضِ”
واعلم يابن ادم ان الله يرزق من يشاء بغير حساب.
كاتب المقال
الدكتور حسن صادق رضوان
المحاضر المتخصص في التحول الرقمي لقطاع السياحة
الخبير والمحاضر التسويقى الدولي
العضو المنتدب ورئيس مجلس ادارة شركة CIHOST
“الدكتور حسن صادق رضوان ” يكتب لــ ” المحروسة نيوز ” عن : دروس الحياة.. الدرس (58) “إنه الأب يا سادة“
