ولما كانت الحياة دروس كتبت بعض الدروس ..
وليس اي دروس الدرس (56) “المرأة والبوك!!“
ربط الاشياء والتعلم منها امر هام في الحياة ،وكلما زادت مراقبتك لما حولك كلما استطعت تلافي مشاكل مستقبلية، مش بس كده .
ده انت ممكن تتوقع ما سيحدث .. طبعا ممكن تصيب وممكن تخطئ ولكن كلما زادت معلوماتك زادت تصرفاتك العقلانية.
من الذكريات الجميلة عندما كنت فى زيارة مع جدتى (رحمة الله عليها ) للإسكندرية علشان بتبيض شقة اسكندرية ..وفي يوم قالت تعالي ننزل سوق كليوباترا اللي ورا البيت نشتري شوية حاجات للبيت.
واحنا في السوق كان فيه ست بتشتري خضار وبعد ما دفعت الفلوس وقع منها حاجك في الارض فقلت لتتا (اللي هي جدتي يعني ) الحقي ده الست دي وقع منها حاجة .. فبصت علي مكان الست وقالت لي يانهار ابيض ده البوك بتاعها اجري خده والحقها قبل ما تمشي.
في الوقت اللي جريت اجيب الشئ المدعو بوك كانت تيتا بتنادي علي الست ، اللي لحقتها واديتها البوك.
لما مسكت البوك كان عليه خرز وشكله جميل ومنفوخ ..بعد الفحص والتمحيص رجعت لتيتا اسألها ايه البوك ده.. ما انا كنت صغير .. قالتلي ده اهم حاجة للست في حياتها في السوق وهو اللي فيه الفلوس ووصل اي حاجة بتتصلح والزرار اللي وقع وصور شخصية وحاجات تانية ممكن توصل لابرة وفتلة،..البوك هو الامان و الطمأنينة
درس اليوم بقي عن اهم بوك في حياة الست المتجوزة وهو البوك(ج)… لو وقع منك البوك (ج) لازم توطي و تلحقيه بسرعة … ليه ؟!!
البوك (ج) هو اهم في حياتك من البوك العادي .. فيه حاجاتك واسرارك والفلوس
لو البوك العادي وقع منك فيه انواع كتير من البشر.
رجالة او ستات لو شافت البوك من غير صاحب هتحاول تستفيد … الستات فيه اللي هاتخده عشان تاخد كل حاجة فيه وفيهن اللي هاتخده تاخد الفلوس اللي فيه و ترميه، وفيهن اللي هاتاخده وعاوزاه عشان شكله ونوعه فيه فلوس او مافيهوش.
وفيهن اللي هاتاخده وتدورعليكي عشان تقولك لقيته .. وفيهن اللي هاتبجي تقولك شفت البوك بتاعك مع واحدة عشان ترشدك او عشان تحرق دمك.
والرجالة اللى لقوه غالبا حايبقي عشان الفلوس او الصور
البوك (ج) هو جوزك اللي شايلة وشايل اسرته وشادد العربية وكرباج الزمن هري ضهره.
اوعي يقع وتقول هابقي اوطي اجيبه .. حافظي عيله زي عينيكي.
الستات البلدي الاصيلة كانت بتحطه في صدرها جنب قلبها.
البوك (ج) هو الامان و الطمأنينة عينك عليه ،المتربصين كتير وفيه منهم اللي هايتريق علي البوك علشان ترميه فياخده هو!!!
