ولما كانت الحياة دروس كتبت بعض الدروس ..
وليس اي دروس ..الدرس ( 41) ” قناعة الرضا ”
الدرس ده حصل النهارده … وديت عربيتي تعمل شوية صيانات خفيفة تيل فرامل وكده وبعد ما سلمت المفتاح للمسئول وهو راجل جدع فحبيت اكتب ماحدث عشان يبقي عارف انا ليه عملت كده … لما جيت احاسبه وقلتله فك لي 50 جنيه عشان ادي الشاب ده بقشيش … فخد الخمسين و قال لشاب روح هات فكة .. ولما جاب الفكة اديت الشاب عشرين جنيه … فالمسئول شاور لي علي واحد تاني كان شغال مع الشاب في عربيتي ،وقالي ده مفيش للراجل ده حاجة اديله عشرة جنيه … بصراحة مارضيتش فأديته عشرين.
فلقيت ربيع (وده اسم المسؤل الجدع) بيقولي طب هات الـ 10 جنيه اللي فاضلة و نادي ولد صغير من حوه و ادهاله وقالي كان بيخدم عليهم .. وقالي اللي كنت عاوز اسمعه (عشان كده كتبت اسمه) قالي شوفت انا جبتلك ثواب قد ايه ؟.. فهزرت معاه وقلتله وخدت الفلوس و لبست ذنوب.
فى سري دعيت له روح با شيخ ربنا يبارك لك زي ما ريحت قلبي بعد ما ركبت قلتله بهزار ما اخذ بسيف الحياء فهو باطل !!.
فقال اشرحلي .. فشرحتله و قلتله في الاخر انا بهزر.
طيب طالما انت بتقرا الدرس يا ربيع لازم تفهم انا ليه طاوعتك و ليه كنت سعيد؟.
لما اديتك المفتاح وقلتلك اركب ايه انت قلت اوبر .
وبعدين سالتني رايح فين؟ .. قلتلك شارع النصر … فقلتلي اطلع علي الأوتوستراد خد أي تاكسي … وفعلا ده اللي حصل
بصيت في اوبر لقيت التكلفة حتي الشركة 27 جنيه فقلت تقريبا التاكسي في الحدود دي او اقل …
شاورت لسواق تاكسي ابيض وطبعا لابس كمامة بس باين من عينيه انه راجل طيب.
احب تملي ادردش مع سواقين التاكسي وكان الحديث عن الرضا بما هو متاح وما يعطينا الله..لما وصلنا طلعت الفلوس فكان معايا ورق بـ 100 و ورقة 50 جنيه وورقتين ب 5 جنيه، يعني الفكة 10 جنيه.
سألته كام يا حاج ؟.
قالي اللي تحسبه، اديته الـ 50 جنيه قالى معيش والله فكة والزبون اللي فات اداني 100 جنيه وخد الفكة.
كان عمال يبص في الفلوس اللي في ايدي فقلتله طب إركن على جنبك .. وها افك من الكشك .. قالي لا هات الفكة .
قلتله و الله مافي .. استني الكشك اهه.
حلف انه ما واخد الا الفكة دي.
يا حاج دول 10 جنيه … قالي رضا من الله فاديتهمله بعد الحاح منه.
وقعدت ادعيله الله يباركله، ودعيت له دلوقتي في الفجر و دعيت لك ربنا يبارك لك.
لولاك ماكنتش هانام … ربنا يبعتلي حد اكلمه في الرضا فيراضيني ، فكان لازم أراضي الناس ،وانت كنت السبب روح يا شيخ الله يبارك لك انت وسواق التاكسي .
“مَّن ذَا الَّذِي يُقْرِضُ اللَّهَ قَرْضًا حَسَنًا فَيُضَاعِفَهُ لَهُ أَضْعَافًا كَثِيرَةً ۚ وَاللَّهُ يَقْبِضُ وَيَبْسُطُ وَإِلَيْهِ تُرْجَعُونَ”
اللهم ابسط علينا من نعمك ما يعجز لساني عن الشكر و بارك في قلبي و روحي فلا تزال تشكرك و تسبح بحمدك حتي تقبضها
كاتب المقال
الدكتور حسن صادق رضوان
المحاضر المتخصص في التحول الرقمي لقطاع السياحة
الخبير والمحاضر التسويقى الدولي
العضو المنتدب ورئيس مجلس ادارة شركة CIHOST
