ولما كانت الحياة دروس كتبت بعض الدروس ..
وليس اي دروس ..الدرس ( 35 )” ساعة لربك “
قبل ما اطلع السعودية لاستلام عملي سنة 1990 كان عندي ساعة من النوع اللي بيسجل فيه ارقام التليفونات.. و طبعا عشان البطارية بتاعتها ما تعملهاش معايا و انا في السفر اديتها للوالد رحمة الله عليه يغير لها البطارية .
وصلت المملكة و يومين تلاتة ببص في الساعة لقيت الشاشة بتلعب والارقام بتتهز و اكتشفت ان الساعة دخلها ميه و انا بتوضي و ده دليل علي ان اللي غير البطارية ما رجعش كاوتش الحماية النهاية بدور علي نمرة مهمة الساعة انطفت و من عصبيتي رميتها في الحيطة و قررت اشتري ساعة بعد النهاية المؤلمة للساعة الرقمية.
بعد ما جه اول الشهر و قبضت نزلت اشوف ساعة و انا راجع من الشغل و كان يوم الاربعاء و كان فيه محل جنب البنك اللي بشتغل فيه .. كانوا اتنين يمنيين و اللي بيبيعوا قعدت اتفرج ما عجبتنيش حاجة.. واحد منهم قال لو عاوز حاجة مش موجودة في العالم تعالي بكرة .. قلتله ليه ؟
بكرة في ساعة سايكو جاية اسمها ورلد تايمر ود اول مرة تنزل تحفة.
قلتله طيب يبقي بكرة .. و طبعا نمت بأحلم بالساعة اللي مفيش زيها
تاني يوم الخميس نزلت علي 7مساءً و طبعا الهنود بيبقوا ماليين الشوارع و اعداد كبيرة وواقفين بيتكلموا في دواير و زحمة جدا .. وصلت المحل .. سألت الراجل الساعة وصلت .. رد اي نعم
و مد ايه طلعها .. كانت اول ساعة في توقيت الدول و اكتر من عقرب و حدوته و كانت مطلية دهب لبست الساعة في ايدي تحفة.. المهم بكام الساعة رد 750 ريال !!!
يا نهارك مش فايت750 لا ده كتير قوي !!.
انا عمري ما كنت بأفاصل في الشراء و لا فكرت حتي في مصر اني افاصل .
لقيت الراجل بيرد : اعطيهالك ب 730 ريال.
هو قال كده و انا دماغي نورت الله ما هو بينزل اهه رديت عليه لا ب 600 ريال بس
انا مسكت في ال 600 و هو فضل ينزل لحد ما وصل 630 ريال و مسك مش عاوز ينزل فزهقت .
قلتله ده اخر سعر اقدر ادفعه .. حاروح اجيب الفلوس من الماكينة و هما 600 ريال.
خرجت من المحل في وسط الهنود زحمة فظيعة … الماكينة تقريبا علي بعد 200 متر من المحل .. سحبت الفلوس و رجعت و معايا 600 ريال بس.
دخلت المحل لقيت الاتنين واقفين تقريبا لو وشهم ازرق مش هزار و كأن قلبهم وقف .
واحد اول ما شافني قال .. “أشهد ان لا اله الا الله”
فضحكت و قلتلهم مالكم شكلكوا مرعوبين حصل حاجة؟!
اللي اتشاهد قعد علي الكرسي و بصلي و قالي من ساعة ما خرجت و احنا ندمنا ان ما عطيناك الساعة بال 600 ريال …
رديت عليه طب ما انا رجعت اخدها اهه ندمت ليه بقي !!!
قالي عشان انت خرجت و انت لابس الساعة في ايدك .
ببص في ايدي لقيتني فعلا لابس الساعة و كانت معايا وانا بسحب الفلوس
قلتله قدر و لطف … مسامحين ؟ قالوا مسامحين
عملوا لي فاتورة للساعة بال 600 ريال ،واستخدمتها كتير بعد كده في الفصال و انا بشتري ساعات لأهلي.
اللي عينه مليانة و ربنا حافظه عمر ما حاخد حاجة حرام
اللهم اكفنا بحلالك عن حرامك و اغننا بفضلك عمن سواك
كاتب المقال
الدكتور حسن صادق رضوان
المحاضر المتخصص في التحول الرقمي لقطاع السياحة
الخبير والمحاضر التسويقى الدولي
العضو المنتدب ورئيس مجلس ادارة شركة CIHOST
