ولما كانت الحياة دروس كتبت بعض الدروس ..وليس اي دروس الدرس (34 )
” صلاة الإستخارة وشر الماكرين “
في يوم وانا مروح من الشغل لمحت عربية واقفة، وشكلها عجبني اوي، وللحظ كانت هوندا برضه ( طبعا قولتوا بادي الهوندا) لكن هي دي الحقيقة وكانت اكورد ولونها بني فاتح ميتالك، فطبعا قولت اول ما أحوش قرشين وابقي جاهز اشتري واحدة زي دي.
مرت الايام و حوشت مبلغ وقررت الشراء، صليت استخارة وبدأت ادور وفي يوم خميس راجع بالليل متأخر لمحت راجل بتاع جرايد واقف، نزلت اشتريت الجرنال ودي اول مرة أعملها إني اجيب الجرنال بتاع الجمعة بالليل والعادي انه بيجي البيت.
المهم روحت فتشت فيه لقيت اعلان هوندا اكورد عامل 30 الف كيلو .. لدبلوماسي جميع الكماليات ..، قلت يا مسهل الأمور .. ودعيت “اللهم اذا كان لي في هذا الامر خيرا فارزقني اياه وقربه مني وقربني منه، واذا كان لي فيه شرا فاصرفني عنه واصرفه عني” تعلمتها منذ الصغر و تعلمت انه ايا كان الإختيار فهو من الله و لصالحي.
من بدري صحيت وعلي الساعة 8 اتصلت بالتليفون ردت عليا سيدة صوتها وطريقتها تدل علي انها كانت نايمة.
اول سؤال هي العربية لونها ايه ؟
ردت بني فاتح ميتالك ..و كاملة.
معقول طيب انا جاي لحضرتك .
– جاي فين الساعة 8 الصبح
– لا جاي علي 9 عشان اشوفها واكشف عليها
– اتفضل بس لو ها تخلص هات مقدم ونكتب العقود لو تحب.
– كلمت الميكانيكي اللي باتعامل معاه وقلتله لقيت العربية و جهز نفسك.
الساعة 9 كنا عندها انا اتفرجت علي العربية و طلعت مع الست نكتب العقود واديتها المقدم وكان فيه شرط جزائي وسبت جمال الميكانيكي يفحص العربية.
بعد شوية نزلتله.. ايه الاخبار ؟
– ماتنفعش
– ليه ؟
– واخدة خبطة ومسمعة في الكارتيرة قدام السواق … خدته وطلعنا للست
و قلتلها علي اللي قاله
ردت العربية جديدة
هو يقول وهي تقول المهم قلتلها مش حاينفع الا لما يقولي اوك
طبعا الست اتعصبت والشرط الجزائي المهم رجعت الفلوس وإتخانقنا خفيف وأنا مشيت دمي محروق
بعد ساعتين من وصولي البيت لقيت الست بتكلمني وعاوزانا نرجع لها ..خدت جمال ورجعت خير؟ !!!
لقيتها بتعتذر ،وانها لما نزلت للترزي اللي تحت عمارتها، وتتريق علينا وتحكي له علي قلة ذوقنا.
رد عليها وقالها ان وهي مسافرة في مرة سايس الجراج خد العربية وخرج بيها وهو راجع لبس في عمود و عشان هي علطول مسافرة وداها اتصلحت من غير ما يقولها.
قعدت تعتذر وتطيب خاطر جمال وقالت لو عاوزها خدها بالسعر اللي انت عاوزه،.. ولكن انا رفضت لاني عاوز عربية كويسة.
وربنا رزقني بأختها بعد كام يوم.
الست فعلا كانت مظلومة فنصرها الله ولو بعد حين .. واما من مكروا فعلموا ان الله خير الماكرين.
