ولما كانت الحياة دروس كتبت بعض الدروس ..وليس اي دروس ..الدرس 24 “الجهاد للحج “ ( إنَّمَا الْأَعْمَالُ بِالنِّيَّاتِ، وَإِنَّمَا لِكُلِّ امْرِئٍ مَا نَوَى )
عام 1999 سافرت الي السعودية في رحلة عمل و كانت الوجهه الي أبها وكان فاضل علي الحج تقريبا اسبوع ، كان عندنا عرض للبرامج و مناقشة اسعار ومنافسة كبيرة، قعدنا في الموضوع ده 3 ايام ، والحمد لله ربنا وفقا و تم وتوقيع العقود.
ولما كنا خلصنا بدري حاولنا نحصل علي تصريح للحج و لكن طبعا كنا تأخرنا جدا واعتذر الجميع لأن كان مفروض نبلغهم قبل ما يتقفل التصاريح.
ركبا الطيارة و رحنا جدة ،وقعدنا في شقة اخو واحد من اللي كانوا معايا ، اتكلمنا شوية إزاي ممكن نروح نحج؟!
فقلنا ممكن نروح بهدومنا ونحرم في مكة، وندبح و هكذا حضرنا حالنا ونزلنا الظهر و روحنا محطة النقل الجماعي عشان نقطع تذاكر لمكة.
كانت الصدمة ان عامل الشباك اشترط تصريح حج أو خطاب تنقل أو إقامة !!! وطبعا ماكنش معانا ولا حاجة من دول ..روحنا نركب تاكسي إشترط نفس الكلام .
في الموسم الاخوة السعوديين بيستخدموا سياراتهم الخاصة في نقل الركاب وطبعا حاولنا و برضه طلبوا نفس الطلبات.
رجعنا وخيبة الامل احزنتنا، وبدا الأمر كانه مستحيل ، كنا ثلاثة، واحد مننا كان ناس قرايبه رايحين فدعوه معاهم ، وسابنا و راح معاهم ( رحمة الله عليه)، وفضلنا انا وموظف معانا ،وهو اخو صاحب الشقة.
اتعرفنا علي جار في الشقة اللي تحتينا ..شاب متجوز من سنتين وكان معاه طفل صغير، وبرضه عاوزين يحجوا، ويوم الوقفة نزلوا و رجعوا 3 مرات و يفشلوا في السفر و يرجعوهم !!.
كنت عاوز أحج بأي شكل (علي الرغم اني كنت حجيت قبل كده الحمدلله 1990) وابتديت أسأله رجعتوا فين ؟!..قال عند نقطة تفتيش الشميس ، وبينزلوا المحرمين اللي من غير تصريح ، علي بعد اد ايه من مكة – حوالي 30 كيلو متر
علي العصر نزلنا نصلي في الجامع ،واحنا راجعين قولت للزميل، وكان اسمه محمد … انا حاروح اطعم .
رد عليا : ليه ايه المناسبة؟
– عشان لما نروح نحج
– نروح ازاي ده الراجل راح ورجع 3 مرات
– حانروح و لو نزلنا في النص.. انا طول النهار بأجري في النادي ايه يعني لما اجري المسافة نصها ولا كلها !!
– طيب معاك جواز السفر ؟
– اه معايا … يلا في مركز بتاع 2 كيلو من هنا
وخدنا بعضنا و مشينا ووصلنا المستوصف وطلبنا نطعم و اطعمنا وخدنا ورقة معانا وان كانت ملهاش لازمة قد ماكنت عاوز ابقي محصن.
كانت النية و الجوارح كلها بتقول ما ينفعش ارجع من غير ما أحج و أتوب لربي وأروح للكعبة وهي لها معزة خاصة في قلبي فهو يبدء في الانتفاض اذا ما العين لمحت جزء صغير من الكسوة.
المهم رجعنا البيت ،وتغدينا ودخلت نمت و قولت لمحمد قوم ريح الحج مشقة ولازم نرتاح وهو قعد علي الكمبيوتر ..
و للحديث بقية .. يتبع
كاتب المقال
الدكتور حسن صادق رضوان
المحاضر المتخصص في التحول الرقمي لقطاع السياحة
الخبير والمحاضر التسويقى الدولي
العضو المنتدب ورئيس مجلس ادارة شركة CIHOST
