ولما كانت الحياة دروس كتبت بعض الدروس …. و ليس اي دروس ..الدرس (١١) عله خير
معظمنا لما تحصله مشكلة و يتعطل يثور و يتعصب و يندب حظه العاثر اللي وقعه في هذا الحدث الطارئ الذي منعه من قضاء مراده الاصلي … هل تتخيل انك تعلن الغيب … بالطبع لأ
اذا فماذا تفعل في موقف مماثل ردد مثلما افعل عله خير … عله خير
تعلمتها منذ زمن بعيد و لا انذكر من الذي قالها امامي و لكن تعلقت بها … فهي في قلبي تعلن ايماني بالله و بقدري الذي ينظمه الخالق الواحد الصمد و ماحدث في الاسبوع الماضي خير دليل
سمعت صوت غريب في السيارة يدل علي مشكلة في المساعد الشمال امامي و لأنه كان يوم الإثنين و انا عامل حسابي اسافر البلد الخميس علي غير العادة و اللي بتكون يوم الجمعة فكان عندي وقت اصلح العربية و اجربها..
و بما ان كان عندي جوز مساعدين روحت اشوف المساعد و الميكانيكي فكه لقينا فعلا المساعد تالف … فركب واحد من الاتنين اللي معايا و خلصت الساعة 5.30م و لحقت اضبط زوايا بالعافية لان المحلات بقت تقفل 6.00 م و صاحب ورشة الزوايا نزل باب الورشة و انا بجرب العربية
جربت العربية لحد يوم الاربعاء ولكن مازال فيه تخبيط فرجعت للميكانيكي و اكتشفنا ان جلب المقصات باظت و هي قطع كاوتش ذات قلب حديدة لتثبيت المقصات
ابتدينا نصلح العربية يوم الخميس الساعة 2 و استمر تركيب الجلب حتي الساعة 5.45م وكان في نيتي السفر بعد ما اخلص و لكن حدث مالم اتوقعه و هو ان بتاع الزوايا كان بيقفل … شمال يمين رفض و قال بكرة … تعالي بكرة الجمعة احنا بنفتح من 8الصبح
طبعا باظت الترتيبات فقلت للميكانيكي لما رجعت له حا اجرب الصبح … سألني و السفر ؟ قلت له : عله خير … عله خير رد ونعم بالله
في صباح الجمعة رحت الساعة 8.30 لبتاع الزوايا اللي نزل تحت العربية و خلص شغله
و قبل ما يطلع قالي : كويس انك جيت الصبح يا دكتور
– خير؟
– العجل ده علي وشك ينفجر!!!
– قلت له انهي عجل ؟
– الاتنين اللي قدام
– ليه ده انتاجه لم يمر عليه 3سنوات و ما عملش 30 الف لسه؟
– تعالي حضرتك بص
نزلت ابص لقيت عجلة تقريبا مقطوعة بالعرض 5 سم و التانية فيها شق طولي لا يقل عن10سم و الصور واضحة
ضحكت له و قلت ما انا عارف من امبارح .،، قالي يبقي لازم تغيرهم
قولت طبعا و دلوقتي
كنت عارف انه خير و انما منعت من السفر لخطر يحدق بي و كاوتش حاينفجر
تذكر دائما انه ربك الله و انه حاميك و حافظك و ما يبتليك الا ليمنع عنك اما في الدنيا او في الاخرة
اللهم انت ربي و انا عبدك خلقتني و انا علي عهدك ووعدك ما استطعت . اعوذ بك من شر ما صنعت .. ابوء لك بنعمتك و ابوء لك بذنبي فأغفر لي فأنه لا يغفر الذنوب الا انت
كاتب المقال
الدكتور حسن صادق رضوان
المحاضر المتخصص في التحول الرقمي لقطاع السياحة
الخبير والمحاضر التسويقى الدولي
العضو المنتدب ورئيس مجلس ادارة شركة CIHOST
