ولما كانت الحياة دروس كتبت بعض الدروس …. و ليس اي دروس..درس لا ينسي ( 8 )
المال مال الله.. و لن يستطيع احد ان يسرقك او يسلبك ما كتب الله لك
انها قصة حقيقية حدثت لي من 20 سنة و اكدت لي ان ماكتب لك هو لك و ان المال مال الله يؤتيه من يشاء اينما شاء …
في وقت من الاوقات في سنتين قبل هذه السنة كانت هناك موضة البورصة و اللي و كانت الناس كل ما تتمناه هو شراء اسهم في البورصة المصرية و جني الربح مع الاكتتابات المتتالية و اذكر ان اعطيت صديق ( و هو حي و يعلم جزء من القصة) في شركة اوراق مالية مبلغ من المال يستثمره في البورصة لي … و مرت الايام و انا كل شوية اسحب من المبلغ حتي بقي رصيدي عنده علي حساباتي 300 جنيه ده خط من القصة
الخط الثاني : كنت قد قررت الدخول كشريك في شركة و قررت بيع سيارتي الهوندا الحديثة و استبدالها بأخري برليود اسبور موديل اقدم للانتفاع بفرق السعر لمصاريف المنزل حتي تقوم الشركة و تبدأ في الحصول علي دخل .. و بعد شراء السيارة اكتشفت بعد فترة ان بها عيب في الفتيس (ناقل السرعات الاتوماتيكي) و ذهبت الي ورشة سيارات هوندا وللأسف اللي كان فيها عمل عليا شغل و بعد جهد جهيد تم الاصلاح
مازلت انذكر هذا اليوم لأنه كان صابح اجازة العيد و كنت في المكتب الساعة 11 تلقيت مكالمة من الاسطي في الورشة يبلغني ان العربية خلصت و انها اتكلفت 3000 جنيه و بكده يبقي العربية دي عشان ترجع لحالتها الاصلية اتكلفت 6000 جنيه لأن اضطريت اشتري فتيس تاني ….و كان معايا في البنك ما يقرب من 2800 و ماقدرش و لا اتعودتش استلف من حد … بعد تفكير هداني تفكيري ان اكلم صديقي اللي في البورصة و اقوله اني محتاج اقفل حسابي و ان شاء الله لما يجيلي فلوس قريب حارجع تاني
و مش عارف اوصلكم حالتي النفسية و انا بكره العيد و مفيش الا 100 حاتفضل من الفلوس بعد ما اخد ال300ج
كلمته زي ما خططت و الراجل تفهم و قالي حا ابعتلك حد مع الحساب بس علي الساعة 5.30م …. انتوا متخيلين انا قاعد في المكتب و مستني الاخ و الورشة بيكلموني جاي امتي تستلم العربية ؟؟؟
اعمل ايه قمت صليت و استنيت الراجل
الساعة 5.45 م الجرس ضرب و قمت فتحت لأن الناس كلها مشيت
دخل شاب معاه ظرف و ورق و قالي ان من طرف الشركة و الظرف ده لحضرتك
فطبعا قبل ما افتح الظرف طلبت الصديق للتأكد من محتوياته
فرد قالي ما هو فيه ورقة معاه بالرصيد
قفلت السكة و بأمضي علي الورقة لقيت المبلغ 6300 ج اتخضيت
رجعت طلبته ده مبلغ 6300ج فرد قالي اه ما هو ده اللي كسبته فلوسك
و الله قلبي كان حايقف … ال300 و معاهم ال 6000 بتوع العربية
و بدلا من ان يكون اسوء الاعياد اصبح من الذكريات التي لا تنسي
ان كل ما حدث انه هو درس عميق لما يدبر البشر و لما يقسم ربك الارزاق … ظلمت في هذه السيارة ووعدني ربي حقا لأنصرنك و لو بعد حين
سيحاول الكثير سرقتك و النصب عليك و لكن ابدا لن يتركك ربك و سيرد لك كل حقك … و لو اجتمع اهل الارض جميعا علي ان يضروك ما استطاعوا الا ان يشاء الله
كاتب المقال
الدكتور حسن صادق رضوان
المحاضر المتخصص في التحول الرقمي لقطاع السياحة
الخبير والمحاضر التسويقى الدولي
العضو المنتدب ورئيس مجلس ادارة شركة CIHOST
