الدكتور حسن صادق رضوان يكتب لــ " المحروسة نيوز " عن : دروس الحياة 5 (حلوة أوى يا بطاطا )

ولما كانت الحياة دروس كتبت بعض الدروس …. و ليس اي دروس ..درس لا ينسي (5)

كنت قاعد في مكتبي و مركز في حاجة و كان يوم شتاء و درجة الحرارة منخفضة و لكن مفيش امطار .. فجأة قومت اتحركت شوية داخل المكتب و بدون مناسبة قررت انزل الشارع .. والله بدون سبب… سألني حد هو حضرتك رايح فين … رديت حأجيب حاجة من العربية و اخدت مفتاح العربية و نزلت … انا راكن شمال .. لقيت روحي اتجهت الي اليمين بدون سبب و مشيت علي رجلي بدور علي ايه ؟ معرفش

قلت يمكن جعان اشوف محل اكل اجيب منه حاجة … الله طيب ما انا كنت بعت الفراش !!!!

مشيت اكتر من 300 متر و انا داخل علي ميدان الجزائر لقيت عربية بطاطا وشاب بيزقها .. فمشيت بسرعة احاول الحقه … ما بين ما لحقته و ما بين ما كنت واقف كان فيه حوالي 50 متر

المهم سألته بكام قالي اللي انت عاوزه … قلتله قول انت

– اعملك طبق بخمسة ؟

ولأن الدنيا برد قلتله ..

– طبقين كل واحد ب خمسة

اديته العشرة جنيه و مشيت و انا مبسوط اني نفعته ثم جاء موعد الدرس

لقيت راجل كبير فارش حاجات في الارض و بيبيع لبان علي اقلام … فكرت اديله بطاطا لكنه كان بياكل فسبته و مشيت

بعد عشرين متر ( داخل ال50متر اللي حاولت الحق فيهم بتاع البطاطا ) لقيت ست عجوزة و معاها شوية حاجات زي مناديل و شكلها سقعان جدا .. رحت طالع علي الرصيف و رحت واخد بطاط من الطبق و الله كانت بتطلع دخان و اديتهالها …محدش حايصدق روعة الضحكة اللي اترسمت علي وشها من الفرحة و كم الدعاء اللي دعته ليا

مشيت كمان 10 م لقيت شاب ابكم جالس علي بال المسجد و الباب مقفول لامم حواليه اكياس نايلون … طلعت بطاط و اديته منها قعد يتمتم و هو بيبصلي ما فهمتش منه حاجة… بعد كده طلعت المكتب وانا بأكل بطاط ووزعت علي الزملاء الباقي

– عندما يريد الله ان يرزقك الثواب فلا تستطيع المنع ..

– و لا اروع من لذة ان يستخدمك ربك كسبب لأيصال الرزق للخلق

– من اروع ما رأيت في تنسيق ال50 متر الي اضطريت امشي فيها بسرعة عشان الحق بتاع البطاطا و هو منطلق ليعبر بي هؤلاء الثلاثة حتي يكونوا في طريق العودة

– ما الذي منعني من اعطاء الرجل الاول و اوصلت رزق ربي للاخرين

درس رهيب لم اكن اتوقعه

تدبر ما حولك من افعال و روعة الخالق و لا تسير في الارض تبغي مالا و لا جاه

سبحانك اللهم و بحمدك .. سبحان الله العظيم

كاتب المقال