دب طاخ
السياحة (1)
– ما الذي يحدث اذا تعاملت مع شخص علي انه مزعج و مهمل و مقرف و انك من الاخر مش عاوز تتعامل معاه!!.
– و ما الذي يحدث لو رحت تشتري حتة جبنة او حتي علبة سجاير و رد عليك البياع بضعف السعر عشان انت مصري!!.
– و ما الذي يحدث عندما تكرر في المحافل والمؤتمرات انك مش لازمك التعامل مع الشخص ده و ان قلته احسن!!.
.اكيد الشخص ده رد فعله حا يبقي مماثل و لو طال مش عاوز يشوف وشك!!.
تخيل بقي لما تبقي انت كلك عبر , وفاكر انك مفتح ،و الناس كلها كاشفاك
ده الوضع للأسف مع السائح المصري …اللي هرب و راح تركيا و لبنان و قبرص (قبل الكورونا ) وكل ما السياحة في مصر تخرب تجري الفنادق عليه و قوله تعالي و النبي الحقنا ،وفي بعض المصريين تروح تلحقهم.
طب خليني اوضح شوية العبر اللي الفنادق وشركات السياحة اللي بتعملها في المصريين.
1- الاسعار ضعف اسعار السياح الاجانب ويمكن اكتر …ازاي السائح الاجنبي ب 20 و 25 دولار واكل شارب نايم اي ما يوازي 300 جنيه و المصري ما يتراوح فوق 500 و 1000جنيه ..المفروض توحيد السعر علي الجميع لضمان اعلي نسبة للأشغال بدل التسول وقت الظروف الصعبة.
2- لماذا لا يتم التعامل بالجنيه المصري بدل من الفوضي في العملة و كل من هب و دب بياخد عملة من السائح الاجنبي ،و في حالة الجنيه المصري فالسائح الاجنبي سيقوم بتغيير عملته من البنك او اي مكان و لكن توحيد السعر مهم
3- بدل من الدعم و الصرف علي الترويج لمجموعة بعينها من اصحاب الشركات و الفنادق علينا توجيه الدعم لتنمية السائح المصري و توعيته للمحافطة علي الفنادق المصرية و التاكيد علي المظهر الحضاري للمصريين و ليس فقط للمحافطة علي الفندق
4- الاخد في الاعتبار بأن هناك نسبة تالف نتيجة التشغيل و هي نسبة محسوبة من مصاريف التشغيل يعني الحاجة لما تتلف او تتكسر ده امر طبيعي و ممكن يتحملها السائح ده او ده مفيش خيار و فقوس
5- عمل حملات ترويجية و منع التفرقة في الفنادق و كل الفنادق ممكن بها الحجر حتي للمصريين فهي في الاول و الاخر ارضهم و الفندق ليس مستعمرة و لا سفارة .
6- وزير السياحة فين من السياحة في كامل مصر هو اللي مفيش غير سيناء و الاقصر و اسوان …..يا باشا نتحرك شوية …ليه مش كل المحافظات يبقي فيها سياحة ويبقي فيها منتجات لسياحتها، ويتم الترويج لها …حلوان و متحف الشمع و الحديقة اليابانية و كبريت و حكايات كتير ….الفيوم والبحيرة …..الشرقية و الخيل العربي ومزارع الخيل …كل محافظة فيها اللي يخليها ممكن لها سياح ….فكروا شوية و اخرجوا بره الصندوق حرام عليكم!!
7 -معالي وزير اسياحة و الاثار ارجوك اعمل مسابقة للاخوة الكتاب و المخرجين والمنتجين …كل واحد يورينا وطنيته عاوزين اربع او خمس افلام زي “غرام في الكرنك” و زي مجموعة “لارا كروفت” بتاعة انجلينا جولي في اماكن سياحية حتي لو اضطريتم تستعينوا بالمشاهير و ان كنت متأكد ان الممثلين الكبار في مصر ممكن يطلعوا حاجة احسن
اعملوا دول و اوقفوا التسول
هناك العديد من النقاط اللي ممكن تتناقش لو فيه حد عاوز يعمل حاجة
كاتب المقال
الدكتور حسن صادق رضوان
المحاضر المتخصص في التحول الرقمي لقطاع السياحة
الخبير والمحاضر التسويقى الدولي
العضو المنتدب ورئيس مجلس ادارة شركة CIHOST
