تخيل حضرتك عاوز تعمل جهاز و تبيعه وبحثت عن مكان تعمله فيه … وكان أمامك أكتر من مكان مجهز.
عاوز رأيك لو لقيت مكان بيحاول يجذبك بشتي الطرق، وبالبلدي بيحاول يڨييد صوابعه العشرة شمع ،وسهلك دخول فلوسك، وتقنين عملك ،و منحك بيانات زي ما أنت عاوز .
لقيت المكان جاهز فيه غاز و كهرباءوميه وكمان طرق تيسر عليك النقل.
إنما لقيت العمال اللي في المكان فيهم الصفات العجيبة دي
– فهلوي و مش عاوز يطبق الطريقة اللي حضرتك واضعها كنظام للتصنيع و عاوز ينط خطوات من شأنها تأمين العمل
– ثرثار ما بيبطلش كلام عن نفسه و بيته والإدارة والزملاء
– الإلتزام عنده معناها ،انه عبد فلازم يجي متأخر ،ولو عرف يسرق دقيقة هايسرقها؟
– معتبر نفسه شريك في رأس المال ومش واخد حقه.
– مستعجب الناس اللي حواليه بتأخذ المرتبات دي إزاي حتي لو كان هو أعلي منهم.
– إذا عرف مرتب حد يذيعه في كل حته ومعاه الكلمة الشهيرة ” هو بيعمل إيه يعني عشان ياخد كده”؟
– شايف إنه المفروض أهم واحد وإنه هايوقف الشغل لو ماحدش راضاه !
– الحقد علي المديرين واصحاب العمل تحت بند ،ماهم بيلاقوا الفلوس … أو أصل ده غسيل أموال!
– تفضل تدربه علي كل حاجة أنت عاوز تعملها ،ودي يمكن الحاجة الوحيدة الجميلة إنه قابل للتعلم وذكي جداَ!!
أين نحن من هذه النقطةٕ؟! .. إن الشركات العالمية أهم ماتوليه أهمية قصوي هي الجودة و الإنسان !
ولكي تصل إلي الجودة المطلوبة تبحث عن ايدي عاملة، وموظفين ،ومديرين، يعملوا بمواصفات قياسية، وليس بضرب السير الذاتية ،وضيف حته من هنا علي حته من سيرة حد تاني !
علينا ان نبدأ علي الفور برنامج لتأهيل جميع المصريين بأهمية الإستثمار ( ولا أقصد شوية إعلانات)
لا…. أنا أقصد برامج نفسية للرضاء بأكل العيش وأهمية الذمة, والضمير والالتزام و الجودة
لازم نوضح للمستثمر إن إحنا كفاءة ،و ده عن طريق توفير الأيدى العاملة اللي بيدور عليها .
لأن تكاليف الحصول علي منتج قيم وجيد في الشركات العالمية يحتاج الي موظفين بجودة عالية مما قد يضطر الشركة إلي نقل العمالة من الخارج ويبقي التكاليف زادت بدرجة هائلة من تأمين وبدلات.
و كده تبقي غير مجدية للطرفين للمستثمر و لا للدولة اللي ماحلتش معضلة البطالة
