الشخص اللي بيجي ع بالك اول ما تقع في مشكله ، اللي اول ما بتحصلك اي حاجه تفرح لازم تروح تجري عليه و انت متأكد أن فرحتك هتزيد بمجرد ما تشاركها معاه.
الشخص الي بيعتبر مشاكلك مشاكله ، اللي بيفكرلك وقت ما تبقي عايز تفصل من كل حاجه ، اللي بتاخد رأيه في كل تفصيله وانت واثق أنه عمره ما هيغرقك الشخص اللي تقوله انا زعلان و قلبي حزين يقولك هاكونا ماتاتا.
الشخص دا فيه مميزات كتيرة اوي عامل زي ال Multitasking كدا.. اللي هو اي حاجه هو معاك ، في فرح هتلاقيه اول واحد واقفلك في الحزن هتلاقيه جمبك بيقسم معاك همك لحد ما تنسي انت كنت زعلان ليه اصلا !.
مكانته مشكلها بأيدة و مفيش حد مقرب منها لان ببساطه محدش هيسد فيها غيره .
بحكي مع حد قريب ليا من فترة بقولها بس اشمعنا دي دونا عن باقيتهم دول معاكي بقالهم سنين ؟
لقيتها ابتسمت و قالتلي رد عمري ما نسيته ابدا قالتلي أصلها اللي فضلت فيهم ..كل مرة كان بيحصل حاجه كان بيقع مني واحد و لما جه الدور عليها اثبتتلي أن كل الي وقعوا مني كان لازم اسيبهم يبعدوا وانا الي هبقي كسبانه مع انها مكنتش اقربهم ليا بس فعلا يمكن ربنا خلي كل المشاكل دي تحصل عشان يبينلي أن قد ايه هي أنسب واحدة فيهم للمكانه دي و إن فعلا ربنا بيبقي شايل الخير بس لازم تدوق الوحش عشان الحلو لما يجي تقدرة و تعرف قيمته!.
وفعلا لو ركزت علي اللي ضاع منك عمرك ما هتشوف اللي بيستناك .
وافتكرت جمله قرأتها بتقول : هذا صديقي ، أعرفه منذ خمسين شدة ، وعشرين أزمة ..
الصحوبيه عمرها ما كانت بتتحسب بعدد السنين على اد ما بتتحسب بالمواقف و الأزمات الي بتعدي بيها و الشخص دا موجود جمبك
فكرة الجدعنه فكرة مكلفه جدا و مش اي حد يقدر عليها في حاجات كتير جدا بتمنع الظروف بتمنع المصلحه بتمنع متلومش علي حد أنه مستجدعش معاك هو غصب عنه أصلها طبع يا موجود يا مش موجود !
اللي عايزة اقوله انك متلومش علي الظروف و متزعلش من اي مشكله حصلت بينتلك حقيقه اللي حواليك كان من دعاء الصالحين “اللهم ارنا الاشياء كما هي” وان فعلاً اد ايه دي نعمه كبيرة انك تشوف الاشياء و الأشخاص علي حقيقتهم ساعتها بس هتقدر تتعامل بواقعيه و هتستوعب حقيقة إنك تبقي لوحدك أحسن ميت مرة من إنك تبقي موجود وسط ناس مش شبهك أو وجودهم في حياتك مجرد فضول.
دور علي الشخص الي تعرف تسند عليه وقت ما تميل ، شخص شاف الجانب المظلم في شخصيتك وقرر بكامل إرادته انه يكمل معاك.
شخص يفضل معاك في الوقت اللي مش قادر تشوف فيه اي حاجه حلوة ، . شخص ياخد بايدك و يشاورلك علي النور الي ف آخر الطريق دور علي ناس تخليك متمسك بالدنيا .
فضفضة” بقلم
رانيا محمد
