“معتز صدقى” يكتب لــ ” المحروسة نيوز ” عن : الكورونا. وسنينها.!!

صاحبك اللى شغال فى الخليج وكان عايش ملك خفضوا راتبه وإحتمال يمشوه ومحبوس مش عارف ينزل يطمن علي اولاده!. 

اما صاحبك اللى شغال فى شركة انترناشيونال ومقضيها سفر فى العالم كله فقاعد على كف الرحمن خايف يستغنوا عنه!. 

وصاحبك اللى كان فاتح مطعم والأكل عمره مابيخسر قاعد في بيتهم مش عارف يدفع إيجار المطعم حتى!. 

وصاحبك اللى كان فى مركز كبير ابنه محبوس ومش قادر يطلعه.. وقريبك اللى كان معاه الجنسية وعايش فى امريكا محبوس هناك وبيشوف الجثث حواليه كل يوم. 

حتي الملياردير اللى عنده طيارة خاصة بقت مصدية فى المطار مش عارف يحركها. ولو حتي عرف يحركها مفيش دولة راضية تستقبله وحتي لو استقبلوه اصلا مفيش حد عنده علاج. 

عرفت ان كل الاشياء اللى كنت هتموت عليها وبتبيع كل الناس حتى اقربهم ليك طلع ملهاش لازمة؟

 مفيش شعب عاقل في العالم بيسكن فى شقة 250 متر ويعمل نصها صالون كبير  وسفرة ومطبخ أمريكي مفتوح عشان لما يجي ضيوف يقولوا بيتهم واو و حلو ! 

مفيش شعب عاقل يوم الفرح يدفع مرتب 4 سنين عشان يقولوا عليه قد المقام وعيلته ترفع الراس

 ولاشعب عاقل يعمل عزا يفرشه صالونات يكلفه ألافات عشان يبقى قدالمقام ويقضيها بوس وأحضان؟!

احنا كلنا عايشين غلط باختلاف طبقاتنا و إمكانياتنا الفكريه والمادية !..

من اللي ماسك آيفون 11 وأساسا جايبه بالتقسيط.. لحد اللي بتشتكي غلاء سعر الخضار والفاكهة وهي بترمي نصها في الزبالة آخر النهار !

خللونا نكون صريحين.. احنا مش فقراء ..احنا شعوب ما بتفهمش وناقصه عقل.

للأسف مستهلكين وغير منتجين بالمرة.. إحنا شعب بيحب الفشخرة ويعشق المظاهر.. بنشتغل في وظائف مش بنحبها ومن خارج اختصاصنا عشان نشتري أشياء مش بنحتاجها عشان نثير اهتمام أشخاص بنكرههم !!.. ..

النهارده من اول هزه صغيرة.. الكل بيلطم وبيشتكي.