المحاضر التسويقى الدولى “علاء خليفة” يكتب لــ” المحروسة نيوز” بـ”العامية ” عن : “الكورونا” فى مصر .. ومصايبها !!

الخبير التسويقى والمحاضر الدولى علاء خليفة خلال المحاضرة — علاء خليفة، المحاضر الدولى ، وخبير التسويق الألكترونى للسياحة والطيران

4 ترلييون دولار خسائر إقتصاديات العالم من تأثير فيروس “:ورونا” المستجد..،ويجي واحد مش بيفكر بعقلانيه ويقولك أصل الفيروس ده معمول ومخلق بالمعامل من أمريكا!

أو يقولك الصين عملته علشان إشترت الأسهم لما وقعت في شركات التكنولوجبا!

وطبعا الناس بتصدق و تجري ورا نظريه الموامرة دائماً.

بجد يارب ما يحرمكم من نعمه التفكير !!.

فكروا شويه ، اللي بيحصل ده أسمه وبأء عالمى، وطال بلاد العالم كلها بلا استثناء ،ولازم يتحارب بإجراءات وقائية و بتكاتف الدول كلها معاً!

إفهموا ، في دول كاملة اتحطت تحت الحجر الصحي ،مثل ايطاليا وفي دول عقمت مدنها بالكامل بس إحنا لسه بنفكر ندي إجازه للمدارس ولا لا.!!

في حالة لامبالاه كبيرة بين الناس في مصر، وتقليل متعمد من خطوره إنتشار عدوي الفيروس مع إنه بينتقل من تنفس الشخص المصاب اكتر 1000 مره من عدوي مرض السارس الخطير، ومع إن دولة مثل ايطاليا اللي هيا علي بعد ساعتين مننا للأسف مات فيها 900 شخص في إقل من أسبوعين مع انتشار الفيروس فيها وإحنا ولا هنا!!! .. طناش تام!!!

مش عارف أقول لكم إيه لما دول العالم كلها تمنع الصينين و الإيطاليين وكذا جنسية أخري ممن إنتشر فيها المرض بشده ،ونتفاخر إحنا في مصر إننا لم نمنع أي احد إلي الآن، ونستني لما يظهر عليهم في مصر و ينقلوا العدوي للمصريين!!.

إذا كان وزير الثقافة الفرنسى ،ووزيرة الصحة البريطانية ، ووزراء إيرانيين ،ورئيس الجيش الامريكي ، وشخصيات مشهورة باوروبا ونواب بأمريكا وفرنسا وايطاليا مصابين بكورونا. يعنى فيه دول متقدمة للغاية بكل أمكانيتها مش عارفه تواجه الفيروس!!

أسبانيا ،وإيطاليا ،وفرنسا ،وإيران ،والإمارات ،والسعودية ،والكويت ،والبحرين ،وقطر وكوريا الجنوبية ،ودول بالعبيط أوقفت المدارس و النشاط الرياضى .

ده المصريين أنفسهم ممنوعين من دخول دول كثيرة لأن فيه دول منعت التنقل الداخلي زى إيطاليا والصين وكوريا الجنوبية!

أكيد الدول ديه مش هتعمل الإجراءات ديه من فراغ !.. ده حتى مكلفناش أنفسنا نفكر نعمل تعليق لرحلات الدول المنكوبة.. دول بالعبيط وقفت الطيران من وإلى بلاد عديده على الأقل للدول اللى بقت بؤرة زى ألمانيا، وفرنسا ،وكوريا الجنوبية ،والصين ،وإيران ,

من كام يوم تم فحص فندق هيلتون هيلوبوليس و اثبتت الفحوصات إصابة 3 شيفات في المطبخ الرئيسي بالفيروس ،وذلك منذ أكتر من 10 أيام، تفتكروا كام بوفيه ووجبة أعدوها هؤلاء الشيفات لنزلاء الفندق من المصريين والأجانب!

مش عارف هنفوق أمتي من اللي إحنا فيه. و نبتدي ناخذ إحتياطات أكتر من ذلك؟!

مش فاهم ليه شغالين يقولوا بلاش تهويل .. الموضوع مش تهويل خالص…. الفيروس تم إعلانه وباء عالمي بمعرفه منظمة الصحة العالمية ، والفيروس ده لو أنتشر ببلادنا فعلا هيكون كارثى .. بحجم السكان هنا في بلدنا . .وقلة الامكانيات الطبية الضعيفة,, وانعدام الوعي كاملا .. مش عارف أقول إيه بس بجد ربنا يسترها علينا فعلاً ،لأن الأمر سيصبح أكبر مننا بمراحل إذا لم ناخذ إحتياطات واجبة مثل باقي العالم.. ربنا يحرس مصر ويحفظها من كل سوء ومكروه وشر.