خاف الوجع ل ” ايمان السقا “

متحيرة ؟!
مش دا إللى كنتى بتحلميه
عشمانه انك توصلي
وعشانه وشوشتى الودع
نطق الودع باللى جرى
دلوقتى ليه متكدرة؟!
امرك عجيب
مش كنتى ماسكة ف السما
مستنياها تستجيب؟
يا هل ترى .. فى الوقت ده
كنتى تمام فى حسبتك ؟!
ولا بحسابه توهك ؟!
مين ثبّتك هاتجيبى يومها العيب عليه؟
قلبك … طرى
عجينه سهل تشكليه
عمره ما فكر يغلبك
دا حتى عقلك مفترى _
ان كنتى قلتى ف يومها لاء
كان أيدك
بعتى اتزانك ليه و لمين؟!
مين من ودانك اجبرك ؟!
مين كنتى بيه متأثره؟!
يا مبعتره كل الحروف
حرفين جابوكى ليه ورا ؟!_
يا مكسرة كل الانوف
شدى الكتاف وارمى الكسل
وعيدى تانى همتك
انا راضيه منك ذمتك …
جديد عليكى وقعتك
متعوده طول دنيتك ع البهدله
خلاص بقى عدى الزمن
والكرمشه غطت ملامحك كلها
بقيتى خبره فى الالم
حتى الوجع أصبح يخاف
لما تجزى من التعب
ما تقولى اااااه ….
مستخسره؟!
دلوقتى قومى واكسرى عنك لجامك_
وانترى كل الهموم _
خبى حيرتك م العيون
ل حد يقرأ دمعتك
يفهم معانى شكوتك
وف ثانيه واحده يكسرك
عيشى كده احسن كتير
هالة غموض ترسم لخوف
زى ضلام المقبره