عاد يوم مولدى.. وبصراحة كان يوم جميل جدا.. جمع أحلى صحبة من الأهل والاصدقاء والحبايب..
وبعد ما انتهى اليوم قعدت مع نفسى ومسكت ورقة وقلم وقلت هعمل كشف حساب عن كل اللى حصل السنة اللى فاتت.. ومن غير ما أحس لقيتنى باستعمل الرموز الرياضية اللى كلنا عارفينها والعلامات دى ( + / _ / ÷ / X)
أول علامة كانت الزائد + عرفت من خلالها انا زودت كام شخص ايجابى لحياتى.. وزودت كام خبرة وتجرية نجاح استفدت منها ” وزودت لعقلى كام كتاب وكام معلومة فادتنى وفادت كتير غيرى “
ودخلت على علامة الناقص _ ولقيتنى بقول ( الحمدلله ) بناقص اى شخص ينقص من حياتى اى نجاح واى فرحة.. بناقص اشوف الحياة بنظارة سوداء.. بناقص الطريق والصديق والرفيق اللى ووشوشهم بيضا وقلوبهم حاجة تانية !
ووصلت لعلامة ÷ القسمة ولقيتنى قسمت حياتى ووقتى على اتنين وثلاثة وعشرات ومئات عشان أقدر أفيد الكل واتواصل مع الكل وتبقى دايما النهاية محبة وعشرة كلها خير ..
ولما وصلت لعلامة الضرب × عرفت ازاى استفيد منها وكانت دايما طريقى للزيادة.. ضربتها فى العمل وفى الخير وفى حب الناس فادتنى كتير وكان عائدها كبير..
عرفتم ليه بقولكم أعياد ميلادنا كشف حساب.. بعد نهاية سنة ومع بداية سنة جديدة كشف حسابك هيعرفك السنة الجاية
هتزود مين ؟
ومين بناقص منه؟
وازاى تقسم وقتك وحياتك ليك ولغيرك؟.
ولما تستخدم جدول الضرب لازم تعرف هتضرب فى كام عشان تكسب ايه؟
كل عيد ميلاد وانتم بخير ودايما طيبين..
